“Plug-in” hibrid avtomobillər rəsmi rəqəmlərdən daha çox yanacaq sərf edir - ARAŞDIRMA

Avropa Birliyinin tətbiq etdiyi Bortda Yanacaq Sərfiyyatının Monitorinqi (OBFCM) sistemi plug-in hibrid avtomobillərlə bağlı maraqlı nəticələr ortaya çıxarıb. Artıq laboratoriya testlərinə deyil, real yol şəraitində avtomobillərin özləri tərəfindən qeydə alınan məlumatlara əsaslanmaq mümkün olub.

Avtosfer.az xəbər verir ki, 2021–2023-cü illərdə yollara çıxan 981 min avtomobilin təhlili göstərib ki, rəsmi WLTP testlərinə görə hər 100 km-ə 1,5 litr yanacaq sərf etməli olan plug-in hibridlər real şəraitdə orta hesabla 5,9 litr sərf edir. Bu isə kağız üzərində vəd ediləndən təxminən 300% çoxdur.

Mütəxəssislər bildirirlər ki, WLTP laboratoriya sınaqları sürücülərin avtomobilləri müntəzəm şəkildə elektrik şəbəkəsinə qoşacağını nəzərə alır. Lakin real məlumatlara əsasən, elektrik rejimindən istifadə cəmi 27–31% təşkil edir. Bir çox hallarda sürücülər avtomobili doldurmur və nəticədə ağır batareyalı nəqliyyat vasitəsi adi benzinli avtomobil kimi istifadə olunur.

Seqmentlər üzrə fərq də diqqət çəkir. Toyota Prius və Ford Kuga kimi daha əlçatan modellərdə elektrik istifadəsi 35–43% aralığındadır. Lüks seqmentdə isə bu göstərici xeyli aşağıdır. Xüsusilə Porsche plug-in hibrid modellərində elektriklə hərəkətin payı orta hesabla cəmi 0,8% olub, median göstərici isə 0% təşkil edib.

Ekspertlər hesab edirlər ki, problem texnologiyada deyil, istifadə vərdişlərindədir. Doldurulmayan plug-in hibridlər bəzi hallarda adi benzinli avtomobillərdən daha çox yanacaq sərf edir və daha yüksək emissiya yarada bilir.

Eltac