Polkovnikin 1 milyonluq dələduzluq işində adı keçən şəxsin məhkəməsi başlayır

Bakıda sabiq hərbi qulluqçu, ehtiyatda olan polkovnik Sahib Şükürovla birgə dələduzluq etməkdə təqsirləndirilən Qədir Sultanovun cinayət işi üzrə ibtidai istintaq başa çatıb. Avtosfer.az-ın "Report"a istinadən xəbər verir ki, cinayət işi baxılması üçün Bakı Ağır Cinayətlər Məhkəməsinə göndərilib. Cinayət işi hakim Əliövsəd Abasovun icraatına verilib. Məhkəmənin hazırlıq iclası yaxın günlərdə açıqlanacaq. Zərəçəkmiş qismində Xanımbacı İsmayılova tanınır. Qeyd edək ki, S.Şükürov ümumilikdə 1 milyon manata yaxın dələduzluq etməkdə təqsirli bilinir. İttiham aktına əsasən, o, İlqar Əliyevi işə düzəltmək adı ilə, Xanımbacı İsmayılovanın isə qızı və nəvəsinin cinayət işinə xitam verdirəcəyi vədi verərək onların pulunu dələduzluq yolu ilə ələ keçirib. S.Şükürov məhkəmədə ifadə verərkən bildirib ki, pulu Q.Sultanova verib. Adı cinayət işində keçən Q.Sultanov daha sonra həbs edilib. Onun cinayət işi ayrıca icraata ayrılıb. Həmin şəxs də məhkəmə iclasında şahid qismində dindirilib. Bakı Ağır Cinayətlər Məhkəməsinin hökmü ilə S.Şükürov 9 il 6 ay müddətinə azadlıqdan məhrum olunub. Xatırladaq ki, zərərçəkmiş X.İsmayılovanın qızı Həcər Quliyeva və onun oğlu Sahib Quliyev 2016-cı ildə həbs edilib. Onlar "Bizim market" mağazalar şəbəkəsinin sahibi Rasim Salmanovun şikayəti əsasında tutulub. Həmin şəxslər qohumları R.Salmanovun 4 milyondan artıq pulunu dələduzluqla ələ keçirməkdə ittiham olunub. Bakı Ağır Cinayətlər Məhkəməsinin hökmü ilə S.Quliyev 11 il, anası H.Quliyeva isə 10 il 6 ay müddətinə azadlıqdan məhrum edilib.