Poti limanından yüklərin böyük həcmi Azərbaycana nəql olunub

Bu ilin birinci rübündə Gürcüstanın Poti dəniz limanından ən çox yük Azərbaycana nəql olunub. APA-nın Gürcüstan bürosunun məlumatına əsasən, hesabat dövründə Poti limanında yüklərin 37,1%-ni idxal, 20,15%-ni ixrac, 40,8%-ni isə tranzit istiqamətli yüklər təşkil edib. Limanda emal olunmuş yüklərin 25%-i Azərbaycan, 19%-i Ermənistan, 14%-i Mərkəzi Asiya ölkələrinə nəql olunub. Cari ilin yanvar-mart aylarında Gürcüstanın Poti limanından konteyner daşınmalarının həcmi ötən ilin analoji dövrü ilə müqayisədə 15,1% artıb. Limanda 82 039 TEU konteyneri emal olunub ki, onların da 13,1%-ni Gürcüstana idxal olunmuş əsasən ət, meyvə və şirniyyat məhsullarının olduğu soyuducu konteynerlər təşkil edib. Cari ildə Poti limanında əməliyyatların dayandırıldığı günlərin sayı illik müqayisədə 53%  azalıb. Qeyd edək ki, Poti dəniz limanı Gürcüstan iqtisadiyyatının inkişafında strateji mövqe tutur. Qonşu ölkənin ən böyük limanında yükdaşımalar üzrə bütün xidmətlər həyata keçirilir.