Qış təkərləri məcburi olacaq? : "Bu məsələyə ciddi yanaşmaq lazımdır"

Aparılan araşdırmalar göstərir ki, buz bağlayan və ya qarla örtülən yollarda baş verən yol-nəqliyyat hadisələrinin iştirakçısı olan avtomobillərin əksəriyyətində mövsümə uyğun olmayan şinlərdən istifadə olunur. Soyuq havalarda qış təkərlərindən istifadə olunmaması nəqliyyat vasitələrinin daha çox qəza törətməsinə şərait yaradır.  Beynəlxalq təcrübəyə nəzər saldıqda görürük ki, Avropa ölkələrinin əksəriyyətində, eləcə də Rusiya, Türkiyə və Skandinaviya dövlətlərində qış aylarında qış təkərlərindən istifadə qanunla məcburidir və bu tələbin pozulması ciddi cərimələrlə nəticələnir. Statistik məlumatlara görə, qış təkərlərinin məcburi tətbiq olunduğu ölkələrdə qarlı havalarda baş verən qəzaların sayı əhəmiyyətli dərəcədə azalıb.
Azərbaycanda isə hazırda qış mövsümündə xüsusi şinlərdən istifadəyə dair konkret məcburi tələb mövcud deyil. Bu isə hər il qarlı havalarda yolların bağlanmasına, onlarla avtomobilin yolda qalmasına və yol-nəqliyyat hadisələrinin artmasına səbəb olur. Belə olan halda sual yaranır: ölkəmizdə də qış fəslində qış təkərlərindən istifadənin məcburi edilməsi zəruridirmi?

Mövzu ilə bağlı açıqlama verən nəqliyyat məsələləri üzrə ekspert Elməddin Muradlı bildirib ki, Azərbaycanda belə bir tələb yoxdur.

Onun sözlərinə görə, “Yol hərəkəti haqqında” Qanunun 1 saylı əlavəsində sürücülərin təkər protektorlarını hansı formada saxlanılması tələb edilir:

“Bu formada saxlamadıqlarına görə, İnzibati Xətalar Məcəlləsinin 342.5-ci maddəsi ilə sadəcə 50 manat cərimə nəzərdə tutulur.  Mənim fikrimcə, qış təkəri mövzusuna daha ciddi yanaşmaq lazımdır. Bütün yol polis əməkdaşlarının maşınında təkər protektorlarının ölçülməsi üçün cihazlar var. Bundan geniş istifadə olunmalıdır. İnsanlar da başa düşməlidir ki, təkər oyuncaq məsələsi deyil. İnsan özünə bahalı ayaqqabı alır, amma maşına gələndə düşünür ki, yay təkəri ilə sürə bilərəm. İnsan qışda yay ayaqqabısı ilə gəzə bilər? Yox. Şəhərdə bir az yağış yağan kimi əyləc məsafəsi uzanır, qarlı yerlərdə qəzalar baş verir. Qanunvericilikdə bu məsələyə daha ciddi yanaşmaq lazımdır ki, insanlar məsuliyyətlərini dərk etsinlər"./sfera.az