Rusiyadan “Tramp Marşrutu” ilə bağlı açıqlama: Vəziyyət dəyişə bilər

“Rusiya Ermənistandan “Tramp Marşrutu” layihəsi ilə bağlı aydınlaşdırıcı məlumatlar gözləyir”.

Avtosfer.az Teleqraf-a istinadən xəbər verir ki, bunu Rusiyanın İrəvandakı səfiri Sergey Kopırkin ABŞ-nin iştirakı ilə Ermənistanın cənubunda nəqliyyat dəhlizinin açılması perspektivi ilə bağlı sualı cavablandırarkən deyib.

Səfirin sözlərinə görə, Rusiya nəqliyyat kommunikasiyalarının açılması səylərində lap əvvəldən ən fəal iştirakçı olub:

“Bu, 2020-ci ilin noyabr ayında qəbul edilmiş üçtərəfli bəyanatda da öz əksini tapıb. Üç ölkənin baş nazir müavinlərinin rəhbərlik etdiyi kommunikasiyaların açılması üzrə üçtərəfli işçi qrupunun çox fəal, gərgin və məhsuldar işini xatırlayırıq. Bu, Rusiyanın nəinki dəstəklədiyi, həm də fəal şəkildə töhfə verdiyi və gələcəkdə də töhfə verməyə hazır olduğu prosesdir”.

Nəqliyyat dəhlizinə gəlincə, Kopırkin qeyd edib ki, Rusiya bunun nə olacağı və praktikada necə tətbiq olunacağı barədə daha konkret məlumat gözləyir:

“Əlbəttə, vəziyyət qeyri-müəyyəndir. Bu, Yaxın Şərqdə və Bəsrə körfəzi bölgəsində baş verən hadisələr və İrana hücumla bağlıdır. Ermənistan Baş naziri də bildirib ki, indi bu hadisələri nəzərə aldıqda, bu layihə Amerika administrasiyasının prioritetləri arasında deyil. Başqa sözlə, müəyyən vaxt dəyişiklikləri mümkündür. Bununla belə, prosesi yaxından izləyirik.

Yeri gəlmişkən, baş nazirimizin müavini Overçuk tərəfindən aprelin 2-də bu məsələyə çox obyektiv qiymət və təhlil verilib. O qeyd etmişdi ki, bu layihənin həyata keçirilməsi Rusiya ilə Ermənistan arasında əlaqələrin yaxşılaşdırılması üçün fürsət yarada bilər. Amma bunun necə həyata keçiriləcəyini aydın şəkildə görməliyik”.