Saxta "polis"lərin məhkəməsində şahid dindirilib: "Üzərimdə narkotik maddə var idi"

Bu gün Bakı Ağır Cinayətlər Məhkəməsində hədə-qorxu ilə tələb etmədə təqsirləndirilən Elvin Xudazarov, Fazil Əliyev, Vahid Əliyev və Hikmət Ağayevin cinayət işi üzrə məhkəmə iclası davam etdirilib. Avtosfer.az-ın "Report"a istinadən məlumatına görə, hakim Fikrət Qəribovun sədrliyi keçirilən prosesdə şahid qismində Kamal Poladxanov ifadə verib. Şahid deyib ki, bir neçə şəxs məhəllədə ona yaxınlaşıb: "Həmin vaxt da üzərimdə narkotik maddə var idi. Buna görə də qorxub, qaçdım. Hərdən yeyib-içəndən sonra istifadə edirəm. Sonra evə gələndə həmin şəxslərin qardaşıma özlərini polis kimi təqdim etdiklərini öyrəndim. Onlar məni axtardıqlarını deyib və qardaşımdan 400 manat pul alıblar". K.Poladxanov söyləyib ki, ona dəymiş ziyan ödənilib. Növbəti proses oktyabrın 3-də davam etdiriləcək. Qeyd edək ki, ötən ilin avqust ayında Sabunçu rayon Polis idarəsinin əməkdaşları bir qrup yalançı "polis"i saxlayıblar. Araşdırma zamanı dörd nəfərdən ibarət olan dəstə üzvləri - Elvin Xudazarov, Fazil Əliyev, Vahid Əliyev və Hikmət Ağayevin vətəndaşları hədələmək yolu ilə onlardan pul alması məlum olub. Bu zaman onlar özlərini polis əməkdaşı kimi təqdim ediblər. Yalançı "polislər" qurbanlarını, onları həbs etmək və barələrində cinayət işi başlamaqla hədələyiblər. Cinayət işinin ilkin materiallarına görə, həmin şəxslər bu yolla Sabunçu rayonunun dörd sakininin pulunu mənimsəyiblər. Onlar Fazil Qədimovun, 1975-ci il təvəllüdlü İmran Orucovun min manat, 1958-ci il təvəllüdlü Məmmədəli Novruzovun 740 manat və 1977-ci il təvəllüdlü Kamal Poladxanovun 300 manatını əlindən alıblar. Həbs edilən H.Ağayev bundan əvvəl fırıldaqçılığa görə məhkumluq həyatı yaşayıb. Həmin şəxslərin barələrində Cinayət Məcəlləsinin 182.2.1-ci (hədə-qorxu ilə tələb etmə, qabaqcadan əlbir olan bir qrup şəxs tərəfindən törəldilən) maddəsi ilə ittiham irəli sürülüb.