Şəhid ailələri və qazilərin adından istifadə edib “BakuBus”la bağlı şayiə yaydılar - VİDEO

“BakuBus” rəhbərliyinin şəhid ailələri və qazilər üçün nümunəvi addım göstərərək pulsuz nəqliyyat xidməti tətbiq edilməsi ilə bağlı şayələr yayılıb. Şayəni yayan “patriotnews.az” adlı “Tiktok” səhifəsidir. 

Avtosfer.az xəbər verir ki, səhifənin yaydığı məlumatda şirkətin şəhid ailələri, onların birinci dərəcəli ailə üzvləri və qazilər üçün bütün respublika üzrə “BakuBus” marşrutlarında ödənişsiz gediş hüququ təqdim edildiyi qeyd edilib.

Bildirilib ki, guya şirkətin müvafiq qərarına əsasən, bu kateqoriyadan olan vətəndaşlar sadəcə olaraq müvafiq vəsiqələrini üzərlərində saxlamalı və avtobusa minərkən sürücüyə təqdim etməlidirlər. Bununla da onlar istənilən “BakuBus” xətti üzrə rahat və pulsuz hərəkət edə biləcəklər.

Məsələ ilə əlaqədar “BakuBus” MMC-yə müraciət etdik. Şirkətdən sorğumuza cavab olaraq bildirildi ki, yayılan məlumatlar əsassızdır. 

Şəhid ailələri və qazilər bu ölkənin, əhalinin milli dəyəridir, onlarla bağlı güzəştlərin tətbiqi yalnız “Brutto” müqaviləsi bağlandıqdan sonra mümkün olması ilə bağlı Milli Məclisin deputatları tərəfindən dəfələrlə açıqlama verilib. Bununla yanaşı, pensiyaçılar və tələbələrlə bağlı da 50a%-ə qədər güzəştlərin, eləcə də ictimai nəqliyyatdan istifadə üçün aylıq və illik kartların tətbiqi də müzakirə olunan məsələlərdəndir. 

Eltac Zülfüqaroğlu