Sərnişinin ölümünə səbəb olan sürücü məhkəmədə həbs edildi

Sərnişinin ölümünə səbəb olan sürücü məhkəmə önünə çıxarılıb. Avtosfer.az musavat.com-a istinadən xəbər verir ki, Bakı Ağır Cinayətlər Məhkəməsində ölümlə nəticələn ağır yol-nəqliyyat hadisi törətməkdə təqsirləndirilən Fərhad Quliyevin cinayət işi üzrə məhkəmə iclası başa çatıb. Hakim Eldar Mikayılovun sədrliyi ilə keçirilən prosesdə hökm oxunub. Hökmə əsasən F.Quliyev 6 il müddətinə azadlıqdan məhrum edilib. Onun barəsində seçilmiş polis nəzarətinə verilmə qətimkan tədbiri ləğv olunub. F.Quliyev məhkəmə zalında həbs edilib. Xatırladaq ki, ölümlə nəticələnən ağır yol-nəqliyyat hadisəsi ötən il noyabrın 10-da Siyəzən rayonu ərazisində baş verib. Sumqayıt şəhər sakini F.Quliyev idarə etdiyi “VAZ-21074” markalı avtomobili yol ayırıcına vurub. Nəticədə sürücü və sərnişin, Quba rayon sakini Elman Rəhimov xəstəxanaya yerləşdiriliblər. Sərnişin Elman Rəhimov orada ölüb. İstintaq dövründə F.Quliyev barəsində polis nəzarəti qətimkan tədbiri seçilmişdi.