Sərxoş halda tutlan sürücü məmur oğludur? - DYP-dən açıqlama

DYP-nin keçirdiyi son reyddə sərxoş halda saxlanılan sürücülərdən biri məmur övladıdır.  Avtosfer.az xəbər verir ki, kobud qayda pozuntusu etdiyi üçün Nobel prospektində saxlanılan "Yaguar” markalı avtomobilin sürücüsü Fərhad Hacıyevin yoxlama zamanı sərxoş vəziyyətdə sükan arxasında əyləşdiyi məlum olub. Sərxoşluq dərəcəsinin müəyyən edilməsi üçün həkim müayinəsinə gətirilən sürücünün etdiyi qayda pozuntusu sübuta yetirilib. Əldə edilən məlumata görə, Fərhad Eldar oğlu Hacıyev AZAL-ın vitse-prezidenti Eldar Hacıyevin oğludur. DYP Fərhad Hacıyevin törətdiyi əmələ hüquqi qiymət verilməsi üçün sənədləri məhkəməyə göndərib.

Qeyd edək ki, F.Hacıyevin idarə etdiyi avtomobilin qiyməti 300 min manat civarındadır.

Görüntülər yayılandan sonra Hüseyn adlı reklam meneceri bir neçə telekanala zəng edərək məhz Fərhad Hacıyevin görüntülərinin efirə verilməməsini xahiş edib.

***

“AZAL”ın mətbuat xidmətinin rəhbəri Paşa Kəsəmənski “Qafqazinfo”ya açıqlamasında bildirib ki, sözügedən şəxsin qurumun vitse-prezidenti Eldar Hacıyevlə heç bir bağlılığı yoxdur: “O şəxs Eldar Hacıyevin oğlu deyil. Məlumat yanlışdır”.

Bakı Şəhər DYPİ-nin bölmə rəisi Vaqif Əsədov Avtosfer.az-a bildirib ki, sərxoş halda saxlanılan sürücü Fərhad Hacıyev "AZAL"ın vitse-prezidenti Eldar Hacıyevin oğlu deyil: "Eldar müəllimin 3 övladı var, onları da tanıyıram. Reyddə tutulan adam onun oğlu deyil. Görünür kimlərsə "AZAL"a və Eldar müəllimə qarşı fəaliyyətə keçib və onun işinə kölgə salmağa çalışırlar".