Sığorta şirkəti "zapravka"ya dəymiş ziyanı ödəmir - VİDEO

Sığorta olunan obyektin sahibi ona dəymiş ziyanı 9 aydır ki, sığorta şirkətindən ala bilmir. Beyləqan sakini İlqar Məmmədov deyir ki, rayonun magistral küçəsində yerləşən və ona məxsus yanacaqdoldurma məntəqəsinin anbarında mart ayının 12-də partlayış olub. Hadisə zamanı məntəqənin böyük hissəsi yararsız vəziyyətə düşüb və ona ciddi maddi ziyan dəyib. İlqar Məmmədovun sözlərinə görə, hadisə baş verməmişdən bir müddət əvvəl o, obyektini sığorta şirkətlərinin birində icbari sığorta etdirib. Yəni, sığorta hadisəsi baş verən an onun obyekti sığortalı olub. Buna baxmayaraq, sığorta şirkəti sahibkara dəymiş ziyanı ödəməkdən imtina edib. İlqar Məmmədov bundan sonra məsələ ilə bağlı əvvəlcə Maliyyə Bazarlarına Nəzarət Palatasına müraciət edib. Palata dəymiş ziyanın ödənilməsi üçün sığorta şirkətinə icrası məcburi göstəriş versə də, ödəniş yenə də edilməyib. Daha sonra iş məhkəməyə qədər uzanıb. Ən son Səbail rayon məhkəməsi zərərçəkmişə ödənişin edilməsi ilə bağlı qətnamə qəbul edib. Sığorta məsələləri üzrə ekspert Tural Şükürov bildirir ki, sığorta qanunvericiliyinə görə, obyektlər icbari sığorta edilən zaman təbii və texnogen mənşəli hadisələrdən birmənalı olaraq sığortalanır. Yalnız istisna hallar var ki, baş verən hadisəyə görə sığorta ödənişi edilməyə bilər. Bununla bağlı sığorta şirkətindən isə bildirildi ki, ödəmənin gecikdirilməsi araşdırmanın aparılması ilə bağlı olub. Artıq məhkəmə qərar verdiyi üçün qətnamənin mətni onlara göndərildikdən sonra ödəniş ediləcək.