Sükan arxasında mürgüləmək faciəyə səbəb ola bilər - FOTO

Avropa və ABŞ-də keçirilmiş rəy sorğuları sürücülərin böyük əksəriyyətinin sükan arxasında mürgülədiyini aşkara çıxarıb. Məlum olub ki, sürücülər mürgülədikləri üçün dəfələrlə qarşıdakı avtomobilə çox təhlükəli həddə yaxınlaşıb, ya da yoldan çıxıblar. Yol qəzalarının təhlili göstərib ki, mürgüləmə təhlükəlilik baxımından yüksək sürət və sərxoşluqdan daha çox risk yaradır.  

Avtosfer.az xəbər verir ki, Belçikada virtual avtomobillə sürücülərin mürgüləmə problemi araşdırılıb. Təcrübə üçün kifayət qədər təcrübəsi olan gənc və yaşlı sürücülər seçilib.

3 saat 31 dəqiqəlik sınaq zamanı məlum olub ki, sürücülər sükan arxasındakı vaxt uzandıqca qarşıdakı avtomobillə daha böyük məsafə saxlayırlar. Lakin bu, sayıqlıq deyil, özünüqoruma hissi ilə izah edilməlidir. Digər tərəfdən, yuxulu sürücünün etdiyi tormozlama da çox vaxt effektli olmur.

6 saatlıq testdə (bu zaman kəsiyində Azərbaycanda istənilən A nöqtəsindən B nöqtəsinə getmək mümkündür – müəl.) isə 21 yaşlı sürücü nə az, nə çox 6580 dəfə gözlərini yumub ki, bu da zaman ekvivalentində 18 dəqiqə 18 saniyədir. Sürücülərin təbincə desək, bu cür “gözünün acısını almaq” çox ciddi qəza ilə nəticələnə bilər. 

Adi riyazi hesablama göstərir ki, sürücü 1 saniyə gözünü yumduqda 120 km/saat sürətlə hərəkət edən avtomobil 33 metr yolu “kor şəkildə” qeyd edir. Bu rəqəmləri 18 dəqiqəyə vurduqda nəticənin nə olacağı məlumdur. 

Azərbaycana gəlincə: bu gün sürücülərimiz arasında Bakıdan Qazağa, Astaraya, Zaqatalaya dayanmadan maşın sürməklə fəxr edənlərə rast gəlirik. Bu cür sürücülük heç bir halda, qəhrəmanlıq olmayıb, əksinə, özünün və başqalarının həyatını təhlükəyə atmaqdır. Bəşər övladı dünəndən bu günə mənzil başına tez çatmaq istəyib. Amma, tələskənlik heç bir halda fayda verməyib. 

Azərbaycan ərazi baxımından çox kiçik ölkədir. Görəsən ölkənin bu başından o başına dayanmadan sürənlər Rusiyada necə davranardılar?

Vüqar