Sumqayıt sakininə bıçaqla xəsarət yetirib pulunu alan şəxs saxlanılıb

Saray qəsəbəsində quldurluq edərək hadisə yerindən qaçan şəxs saxlanılıb. Avtosfer.az xəbər verir ki, məlumatı Daxili İşlər Nazirliyinin rəsmi saytı yayıb.  Bildirilib ki, avqustun 4-də Abşeron rayonunun Saray qəsəbəsi ərazisində naməlum şəxs Sumqayıt şəhər sakini Rahim Mustafayevin bud nahiyəsinə bıçaqla xəsarət yetirib 126 manat pulunu alıb. Abşeron Rayon Polis İdarəsi əməkdaşlarının keçirdikləri əməliyyat-axtarış tədbirləri nəticəsində hadisəni törətməkdə şübhəli bilinən Bakı şəhər sakini, əvvəllər məhkum olunmuş Zaur Əhmədov saxlanılıb. Faktla əlaqədar Cinayət Məcəlləsinin 181-ci (quldurluq) maddəsi ilə cinayət işi başlanıb.