Süni intellekt əmək bazarında rəqabətliliyə necə təsir edir? – Ekspert AÇIQLADI

Azərbaycanda əmək bazarında müşahidə olunan yeni trendlər iqtisadi müzakirələrin əsas mövzularından birinə çevrilib. Rəqəmsallaşma, texnologiyanın inkişafı və dəyişən iqtisadi münasibətlər əmək bazarında yeni yanaşmaların formalaşmasına səbəb olur. Hazırda bir çox sahədə ənənəvi iş modelləri dəyişir, yeni peşələrə və fərqli bacarıqlara tələbat artır.
Mövzu ilə bağlı iqtisadçı Xalid Kərimli Avtosfer.az-a açıqlamasında bildirib ki, süni intellekt və avtomatlaşdırma məsələsi getdikcə daha çox aktuallaşır.

“Azərbaycanda da bu proses artıq bir çox sahədə başlayıb. Xüsusilə maliyyə, texnologiya və kommunikasiya sahələrində bunu daha aydın müşahidə edirik. Bu sektorlar yeni texnologiyaların tətbiqində əsas istiqamətlərdən hesab olunur. Hibrid və distant iş modelləri geniş yayılır. Ənənəvi ofis şəraitində işləmə modeli artıq tam dominant deyil. İnsanlar müəyyən hallarda məsafədən və onlayn şəkildə çalışmağa üstünlük verirlər. Hibrid iş modeli getdikcə daha çox tətbiq olunur. Əsas məqam ondan ibarətdir ki, xüsusilə informasiya texnologiyaları, kibertəhlükəsizlik və data analitikası kimi sahələr bütün biznes istiqamətlərində geniş yayılır. Bu sahələrə və həmin istiqamətlər üzrə mütəxəssislərə tələbat sürətlə artır. Eyni zamanda “cloud” texnologiyalarına maraq da yüksəlir. Mühüm məqam isə ondan ibarətdir ki, bu yeniliklərlə paralel olaraq bəzi peşələrə tələbat azalır. Xüsusilə yaşlı və orta yaşlı nəslin əmək bazarındakı dəyişikliklərə uyğunlaşması daha çətin olur. Bu da onların rəqabət imkanlarına təsir göstərir. Digər bir tendensiya isə budur ki, artıq insanların ömür boyu yalnız bir peşə ilə məşğul olması anlayışı tədricən aktuallığını itirir. Əmək bazarı və iqtisadiyyatın strukturu sürətlə dəyişdiyi üçün insanlar davamlı təlimlərə, yeni bacarıqlar əldə etməyə və ixtisaslarını təkmilləşdirməyə ehtiyac duyurlar. Bəzi hallarda isə tamamilə yeni sahəyə keçid etməyə çalışırlar. Bu tendensiyalar fonunda texnologiya və İT sahəsində çalışanlar üçün qlobal rəqabət də formalaşır. İnsanlar artıq bir ölkədə oturaraq digər ölkələr üçün distant şəkildə işləyə bilirlər. Bu isə əmək bazarının beynəlxalq səviyyədə inteqrasiyasını sürətləndirir və rəqabəti daha da artırır. Həmçinin ənənəvi sahələr texnologiyanın və avtomatlaşdırmanın təsirinə daha çox məruz qalır. Xüsusilə yaşlı nəslin əmək bazarında rəqabət qabiliyyətinin qorunması gələcək dövr üçün əsas çağırışlardan biri hesab olunur".
Fatimə Dadaşova