Taksi sürücülərinin qənimləri ifşa edildi - VİDEO

Bakıda taksi sürücüsünə qarşı quldurluq edən şəxslər tutulub. Avtosfer.az xəbər verir ki, hadisə paytaxtın Suraxanı rayonunda baş verib. Sürücü Teymur Müseyibli polisə məlumat verərək bildirib ki, mayın 14-də idarə etdiyi avtomobillə Hövsan qəsəbəsinə apardığı iki nəfər müştəri ona qarşı zor tətbiq edərək 150 manat pulunu və bir ədəd telefonunu əlindən alıblar.

Polis əməkdaşları əməliyyat-axtarış tədbiri nəticəsində qeyd edilən cinayəti törətməkdə şübhəli bilinən paytaxt sakinləri əvvəllər məhkum olunan Akif Cavadov və Vasib Rzayevi saxlayıb. Onlar ifadələrində törətdikləri əməli etiraf ediblər.

Araşdırma zamanı məlum olub ki, saxlanılan şəxslər quldurluq yolu ilə əldə etdikləri mobil telefonu Hövsan qəsəbəsində Mirzə adlı şəxsə narkotik maddə olan heroin müqabilində satıblar. Polis növbəti əməliyyat zamanı Hövsan qəsəbə sakini Mirzə Mirzəyev də saxlayıb. Onun yaşadığı evə baxış zamanı əlavə olaraq satış üçün nəzərdə tutulan 171 qramdan çox heroin və 24 qramdan artıq metamfetamin aşkar olunaraq götürülüb.

Faktla bağlı cinayət işi başlanılıb, hər 3 şəxs barəsində məhkəmənin qərarı ilə həbs qətimkan tədbiri seçilib.

Avtosfer.az