Təhlükəsizlik kəməri problemi; bu marka avtomobillər geri çağırılır

“Ford Motor Company” təhlükəsizlik kəmərinin gərginləşdirmə sistemində aşkar edilən nasazlıq səbəbindən ABŞ-də təxminən 420 min avtomobili geri çağıracağını açıqlayıb.

ABŞ-nin “National Highway Traffic Safety Administration” (NHTSA) tərəfindən verilən məlumata görə, geri çağırılma ümumilikdə 419 967 nəqliyyat vasitəsini əhatə edir. Qərar sürücü və ön sərnişin oturacaqlarında quraşdırılmış təhlükəsizlik kəməri mexanizmlərindəki texniki qüsurla əlaqədar qəbul olunub.

Bildirilir ki, nasazlıq təhlükəsizlik kəmərinin gərginləşdirmə sisteminin düzgün işləməməsinə və kəmərin səhv kilidlənməsinə səbəb ola bilər. Nəticədə təhlükəsizlik kəməri normal qaydada uzanıb-yığılmır ki, bu da qəza zamanı sərnişinlərin qorunma səviyyəsini azaldaraq xəsarət alma riskini artırır.

NHTSA-nın açıqlamasında qeyd olunub ki, geri çağırılma 2018–2022-ci il istehsalı olan “Ford Expedition” və 2018–2022-ci il istehsalı olan “Lincoln Navigator” modellərinə şamil edilir.

Şirkət bildirib ki, geri çağırılma çərçivəsində səlahiyyətli servis mərkəzlərində avtomobillərin təhlükəsizlik kəməri mexanizmləri yoxlanılacaq. Qüsurlu olduğu müəyyən edilən təhlükəsizlik kəməri çarxları və digər əlaqəli komponentlər avtomobil sahibləri üçün ödənişsiz şəkildə yeniləri ilə əvəz ediləcək.

“Ford” avtomobil sahiblərinə geri çağırılma proqramı ilə bağlı əlavə məlumatların yaxın vaxtlarda təqdim ediləcəyini də açıqlayıb.

Eltac Zülfüqaroğlu