Tıxac zamanı avtobus zolağından istifadə edən sürücülərin nəzərinə!

“Avtobus zolaqları ictimai nəqliyyatın sərbəst hərəkətini təmin etmək üçün ayrılıb və buradan digər nəqliyyat vasitələrinin istifadəsi qanunla məhdudlaşdırılıb. Bununla belə, sıxlıq və tıxac yaranan hallarda yol hərəkətini tənzimləyən polis nəfəri vəziyyəti yüngülləşdirmək məqsədilə sürücülərə avtobus zolağına daxil olmağa icazə verə bilər. Burada diqqət edilməli məqam budur ki, belə icazə yalnız həmin situasiya və həmin məkan üçün qüvvədədir. Yəni sürücü avtobus zolağına daxil olur, sıxlığı keçənədək hərəkətini davam etdirir və ilk fürsətdə əsas hərəkət zolağına qayıdır. Bu, sürücüyə yol boyu sərbəst şəkildə avtobus zolağı ilə getmək səlahiyyəti vermir”.
 
Bu sözləri nəqliyyat məsələləri üzrə ekspert Samuran Səmədbəyli deyib.
 
Ekspert vurğulayıb ki, nizamlayıcının göstərişi yalnız yaranmış tıxacın aradan qaldırılması üçün nəzərdə tutulur: “Əks halda, sürücü avtobus zolağında qanunsuz hərəkətdə qalarsa, artıq qayda pozuntusu baş verir və İnzibati Xətalar Məcəlləsinə görə, bu hal üçün cərimə və bal tətbiq olunur. Buna görə də sürücülər bilməlidirlər ki, polis nəfərinin göstərişi müvəqqəti xarakter daşıyır, situasiya dəyişdikdən sonra isə ümumi qaydalar bərpa olunur”.(pravda.az)