Tramp qaydaları dəyişdi - Yeni avtomobillər ucuzlaşacaq

Tramp administrasiyasının ABŞ-də karbon emissiyası qaydalarını sadələşdirməsi avtomobil dünyasında böyük canlanma yaradıb. Bu addım istehsalçıların hansı mühərriklərə üstünlük verəcəyindən tutmuş, elektromobillərin yayılma sürətinə və maşınların satış qiymətinə qədər hər şeyə təsir edir. İndi hamını bir sual düşündürür: Bu qərar həm yaxın gələcəkdə, həm də növbəti illərdə avtomobil bazarını necə dəyişəcək?

Nəqliyyat eksperti Razil Nağıyev bildirib ki, istixana qazları və karbon emissiyası ilə bağlı qaydaların zəiflədilməsi avtomobil sənayesində qısamüddətli rahatlama yaratsa da, uzunmüddətli perspektivdə strateji qeyri-müəyyənlik formalaşdırır.

“Qaydaların yumşaldılması istehsalçılara daxili yanma mühərrikli avtomobillərin istehsalını daha az əlavə xərc və texnoloji təzyiq altında davam etdirməyə imkan verir. Bu, emissiya azaldıcı texnologiyalara və elektromobillərə yönələn investisiyaların müvəqqəti olaraq yavaşlamasına, eləcə də bəzi modellər üzrə avtomobil qiymətlərinin daha stabil qalmasına və ya nisbətən aşağı düşməsinə səbəb ola bilər”.

Ekspert bildirib ki, uzunmüddətli perspektivdə isə bu siyasətin qlobal avtomobil sənayesinin əsas istiqamətini dəyişəcəyi gözlənilmir.

“Avropa İttifaqı, Çin və digər böyük bazarlarda sərt ekoloji tələblərin qüvvədə qalması istehsalçıları elektromobil və alternativ texnologiyalara keçidi davam etdirməyə məcbur edir. ABŞ-də tənzimləmələrin zəiflədilməsi innovasiya tempinin azalmasına və bəzi istehsalçıların beynəlxalq rəqabət qabiliyyətinin zəifləməsinə səbəb ola bilər. Nəticə etibarilə, bu qərar avtomobil sənayesinə qısamüddətli çeviklik versə də, uzunmüddətdə elektromobillərə keçid prosesi ləngisə belə, tam dayanmayacaq və qlobal bazarların müəyyən etdiyi istiqamətdə davam edəcək” - o, deyib.

Qeyd edək ki, ekoloji tələblər və emissiya standartları avtomobil sənayesinin gələcək inkişaf istiqamətini müəyyən edən əsas amillərdən biri hesab olunur./demokrat.az