Vergi islahatı yanacağın qiymətinin enməsinə səbəb olub

Koreya Respublikasında dizel yanacağının pərakəndə satış qiyməti orta hesabla 7,9 faiz enib. Avtosfer.az Azərtac-a istinadən bildirir ki, buna səbəb hökumətin sadə vətəndaşların və kiçik sahibkarların maddi vəziyyətinin yaxşılaşdırılması üçün yanacağa tətbiq edilən vergilərin müvəqqəti azaldılması ilə bağlı qərarı səbəb olub. Hazırda yanacaqdoldurma məntəqələrində dizel yanacağının bir litri 1556 vona (1,38 ABŞ dolları) satılır ki, bu da əvvəlki qiymətdən 7,9 faiz aşağıdır. Qeyd edək ki, Koreya Respublikasının Ticarət, Sənaye və Enerji Nazirliyi ölkədə yanacağa tətbiq olunan verginin qarşıdakı 6 ay müddətinə 15 faiz azaldılması barədə qərar qəbul edib. Bu, ölkə büdcəsinə yanacağa görə vergi daxilolmalarının 1,78 milyard dollar azaldılması deməkdir. Koreya Respublikasında yanacağa görə illik vergi yığımı orta hesabla 23 milyard dollardır.