“Xaliq Faiqoğlu” MMC-də sürücülərlə maarifləndirici görüşlər keçirilib

“Xaliq Faiqoğlu” şirkəti istismarında olan marşrut xətlərindən istifadə edən əhaliyə göstərilən xidmətin keyfiyyətinin artırılması, sərnişinlərin rahat və təhlükəsiz gediş-gəlişinin təmin edilməsi istiqamətində kompleks tədbirlərini davam etdirir.

Şirkətdən Avtosfer.az-a daxil olan məlumata görə, bu çərçivədə həyata keçirilən tədbirlərdən biri də mütəmadi olaraq sürücülərlə görüşlərin təşkil edilməsi, onlarla maarifləndirici söhbətlərin aparılmasıdır.

“Xaliq Faiqoğlu” MMC-nin müasir tələblərə cavab verən Təmir Mərkəzində keçən həftə boyu təşkil edilən görüşlərə ümumilikdə 300-dən artıq sürücü cəlb edilib. Şirkətin təsisçisi Faiq Seyidov şəxsən sürücülər qarşısında çıxış edərək onlara sərnişinlərlə nümunəvi münasibətlərin qurulması istiqamətində müvafiq tövsiyələrini verib. Şirkət rəhbəri hər bir sürücünün yollarda və sərnişinlərlə davranışda məsuliyyətli olmasını, ictimai nəqliyyat sahəsində onların üzərinə böyük vəzifələr düşdüyünü xüsusi vurğulayıb.

Daha sonra çıxış edən şirkətin məsul əməkdaşları sərnişindaşıma sahəsinin günü-gündən inkişaf etdiyini və sürücülərin də bu inkişafa uyğunlaşmasının vacibliyini qeyd ediblər.

Qeyd edək ki, “SAFA Holding” şirkətlər qrupunun tərkibində fəaliyyət göstərən “Xaliq Faiqoğlu” şirkəti fəaliyyətini müasir tələblərə uyğun həyata keçirməkdədir. Şirkət öz daxili imkanları hesabına Bakıya ən müasir standartlara cavab verən sərnişin avtobusları gətirərək sakinlərin xidmətinə verib. Həmçinin bu günlərdə 199 saylı marşrut xəttini də “BakıKart” sisteminə keçirən şirkət nağdsız ödəniş sisteminin tətbiq edildiyi xətlərin sayını 9-a çatdırıb.