Yağışda batan avtomobillərin zərərini KİM ÖDƏYƏCƏK? - AÇIQLAMA

“Əgər yağan yağışlar rəsmi qaydada təbii fəlakət elan edilməyibsə, zərər görmüş avtomobil sahibləri məhkəməyə müraciət edə bilərlər”.

Avtosfer.az xəbər verir ki, bu sözləri Yenicag.az-a açıqlamasında nəqliyyat eksperti Elməddin Muradlı bildirib.

Ekspert son günlər Bakıda və bölgələrdə müşahidə olunan intensiv yağışlar nəticəsində avtomobilləri zərər görmüş şəxslərin dəymiş ziyanı necə qarşılamalı olduqları məsələsinə aydınlıq gətirib:

“İlk növbədə, kasko sığorta bu cür hallarda köməyə çatır. Əgər nəqliyyat vasitəsi sahibinin icbari sığortadan əlavə kasko sığortası da varsa, dəymiş zərəri sığorta şirkəti qarşılayır. Belə bir sığorta təminatı yoxdursa, vətəndaş yol təsərrüfatına cavabdeh olan müvafiq qurumlara qarşı məhkəmə iddiası qaldıra bilər. İddiaçı məhkəmədə həmin qurumların məsuliyyətsizliyi və infrastrukturun qeyri-qənaətbəxş olması ucbatından ona maddi zərər dəydiyini əsaslandırmalıdır.

Lakin dövlət baş verənləri rəsmi şəkildə ‘təbii fəlakət’ elan edərsə, bu halda heç bir qurum ödəniş etməyəcək. Təbii fəlakət elan olunan hallarda zərər təkcə avtomobillərlə məhdudlaşmır, bəzən insan itkilərinə də səbəb olur. Əgər baş verənlər fəlakət deyil, sadəcə normadan artıq yağışdırsa və yol infrastrukturu buna tab gətirmədiyi üçün vətəndaşa ziyan dəyibsə, o zaman zərərin hüquqi müstəvidə tələb edilməsi mümkündür”.