Yeni "qiyamət ssenarisi": Neft 110 dollar olacaq?

ABŞ-ın İrandakı hərbi hədəflərə yeni zərbələr endirməsi və Yaxın Şərqdə artan geosiyasi gərginlik fonunda neft qiymətləri yüksək səviyyədə qalmaqda davam edir. Hörmüz boğazında tədarükün pozula biləcəyi ilə bağlı narahatlıqlar da qiymət artımına təsir göstərən əsas amillərdən biri hesab olunur.

Avtosfer.az "Qaynarinfo"ya istinadən xəbər verir ki, ABŞ-ın İrandakı hərbi obyektlərə yeni hücumlar həyata keçirməsi və İran limanlarına qarşı dəniz blokadasını yenidən tətbiq etməsindən sonra bazarlarda geosiyasi risklərlə bağlı narahatlıqlar güclənib.

İran isə ABŞ ilə "mövcudluq müharibəsi" apardığını bildirərək, regiondan enerji ixracını daha da məhdudlaşdıra biləcəyinə dair açıqlamalar verib.

Analitiklər münaqişənin inkişafını diqqətlə izləyirlər.

"Nissan Securities Investment” şirkətinin baş strateqi Hiroyuki Kikukava bildirib ki, Yaxın Şərqdə gərginliyin yenidən artması neft bazarında alışları sürətləndirib.

Onun sözlərinə görə, region ölkələrinin vasitəçilik cəhdləri davam edir və bazarın əsas gözləntisi genişmiqyaslı müharibənin baş verməyəcəyidir. Bununla belə, münaqişənin gedişindən asılı olaraq, ABŞ-ın WTI markalı neftinin qiyməti 85–87 dollar aralığınadək yüksələ bilər.

Bazarlarda əsas diqqət Hörmüz və Bab əl-Məndəb boğazlarına yönəlib.

Analitiklərin fikrincə, Hörmüz boğazında neft daşımalarının pozulacağı ehtimalı qiymətləri dəstəkləyən əsas amillərdən biridir. Müharibədən əvvəl bu boğaz dünya üzrə neft və mayeləşdirilmiş təbii qazın (LNG) ticarətinin təxminən beşdə birinin keçdiyi əsas marşrutlardan biri idi.

Bundan əlavə, İranın Yəməndəki husilər vasitəsilə Qırmızı dənizə çıxışı təmin edən Bab əl-Məndəb boğazında da yeni risklər yarada biləcəyi ehtimal edilir. Bu isə dünyanın ən mühüm iki enerji dəhlizinin eyni vaxtda təzyiq altında qalmasına səbəb ola bilər.

"Goldman Sachs” hesab edir ki, Körfəz regionundan neft ixracının bərpası gecikərsə, "Brent” markalı neftin qiyməti ilin son rübündə 110 dolları ötə bilər. Əksinə, geosiyasi risklər azalarsa və hasilat gözləniləndən daha sürətlə bərpa olunarsa, ilin sonuna doğru "Brent” markalı neftin qiyməti 60 dollar səviyyəsinə enə bilər.

ABŞ Enerji İnformasiya Administrasiyasının (EIA) məlumatına görə, iyulun 10-da başa çatan həftə ərzində ölkənin xam neft ehtiyatları 1,7 milyon barel azalıb.

Bazarlarda ehtiyatların 2,6 milyon barel azalacağı gözlənilsə də, faktiki göstəricinin daha aşağı olması tədarük çatışmazlığı ilə bağlı narahatlıqları qismən azaldıb.

Hazırda "Brent” markalı neftin bir bareli 85 dollar həddindən bir qədər aşağı qiymətə ticarət olunur. Həftə ərzində isə qiymət 87,55 dollara qədər yüksələrək son bir ayın ən yüksək səviyyəsini görüb.