Yetkinlik yaşına çatmayanlara tütün məmulatları və alkoqollu içkilərin satışı ilə bağlı reyd keçirilib - FOTO

Mingəçevir polisi yetkinlik yaşına çatmayanlara tütün məmulatları və alkoqollu içkilər satan qanun pozucularına qarşı reyd keçirib. Avtosfer.az-ın "Report"a istinadən xəbər verir ki, gün ərzində davam edən reyd zamanı yetkinlik yaşına çatmayan şəhər sakinlərinə alkoqollu içkilər və tütün məmulatları satan ticarət köşkləri və marketlər aşkarlanıb. Reyd zamanı qanun pozucusu olduğu aşkarlanan bəzi obyekt sahibləri qanuna zidd davranışlarına müxtəlif bəhanələrlə əsas gətirməyə çalışaraq, bunu guya müştərilərin yaşını müəyyən etməkdə çətinlik çəkmələri ilə əsaslandırıblar. Buna baxmayaraq, onlar polisin inzibati tədbirlərindən yayına bilməyiblər. Qanunun tələblərinə riayət etməyənlərə qarşı müvafiq cərimələr tətbiq edilib. Reyd iştirakçıları həmçinin bir sıra çayxanalara da baxış keçirib. Bu zaman bir qrup şəxsin qapalı şəraitdə tütün məmulatlarından istifadə etməsi aşkarlanıb. Onlara və obyekt sahiblərinə maarifləndirici xarakterli xəbərdarlıq edilərək, belə halların yolverilməz olduğu bildirilib.