70 yaşlı ölü tabutda dirildi: ŞOK HADİSƏ

Çində 70 yaşlı qadın öldüyü düşünüldükdən və tabuta qoyulduqdan bir gün sonra həyat əlamətləri göstərib.

Avtosfer.az xəbər verir ki, hadisə ölkənin şimalındakı Hebei əyalətində baş verib. The Starın məlumatına görə, qadının yaxınları onun öldüyünü düşünərək dəfn mərasiminə hazırlaşmağa başlayıblar.

Uzun illərdir beyin trombozu və xərçəngdən əziyyət çəkən qadının vəziyyəti ağır olub. Həkimlər şişin artıq müalicə edilə bilməyəcəyini bildirdikdən sonra ailəsi onu palliativ yardım üçün evə aparıb.

Sentyabrın 8-də ailə üzvləri qadında həyat əlaməti aşkar etməyiblər. Digər şəhərlərdən qohumlarının gəlməsini gözləyən ailə onun cəsədini tabuta qoyaraq saxlayıb.

Lakin ertəsi axşam qadının gəlini tabutdan zəif inilti səsləri eşidib. Qadın dərhal tabutdan çıxarılıb.

Məlumata görə, sentyabrın 11-dək qadın özünə gəlib. Vəziyyəti ağır olaraq qalsa da, gözlərini aça bilib, lakin yeyə və içə bilməyib.

Qadın həmin gecə yenidən dünyasını dəyişib və sentyabrın 13-də dəfn edilib.