ABŞ-nin yanacaq təchizat sisteminə kiberhücum olub - İranlı hakerlərlər şübhəli bilinir

ABŞ rəsmiləri İranlı hakerləri yanacaqdoldurma məntəqələrini benzin və dizellə təchiz edən saxlama çənlərində yanacaq səviyyəsini izləyən sistemlərə kiberhücum həyata keçirməkdə şübhəli bilirlər.

Avtosfer.az Trend-ə istinadən xəbər verir ki, bu barədə CNN öz mənbələrinə istinadən məlumat yayıb.

Məlumata əsasən, hakerlər onlayn sistemdəki boşluqdan - şifrəli qorunmanın olmamasından sui-istifadə ediblər.

Telekanal bildirir ki, sistemlərə fiziki ziyan vurulmayıb və hakerlər yanacağın faktiki həcmini deyil, onun səviyyəsini göstərən ekran sistemini dəyişdiriblər.

Araşdırma barədə məlumatlandırılmış mənbələr CNN-ə bildiriblər ki, Tehran əvvəllər də bu sistemləri hədəf almağa cəhd göstərdiyi üçün əsas şübhə məhz İranlı hakerlərə yönəlib. Bununla belə, mənbələr xəbərdarlıq ediblər ki, hücumu törədən şəxslərin heç vaxt müəyyən edilməməsi də mümkündür.