Bakıda film kimi hadisə: Taksi kimi sürdüyü maşını QAÇIRDI

Bakıda taksi xidmətində istifadə üçün sürücüyə etibar edilən 2018-ci ildə istehsal olunmuş Hibrid Toyota Prius markalı 77-US-819 dövlət nömrə nişanlı avtomobil qaçırılıb. 

Avtosfer.az ajans.az-a istinadən xəbər verir ki, hadisə 3 gün əvvəl baş verib və sürücü hələ də tapılmayıb. Faktla bağlı 102 xidmətinə məlumat verilib. Qaçırılan avtomobilin sahibi, sürücünün Laçın rayon sakini olduğunu bildirib. 

İddialara əsasən, həmin şəxs taksi xidmətində işləmək üçün AYNA tərəfindən sertifikat alıb. Ehtimal olunur ki, avtomobilin saz vəziyyətdə olması onun belə bir addım atmasına səbəb olub. Təxmin edilir ki, o, avtomobili detallarını sökərək satmaq məqsədi ilə qaçırıb.

Avtomobilin sonuncu dəfə Bakıdan Sumqayıt istiqamətində hərəkətdə olduğu bildirilir. Hazırda hadisə ilə bağlı başqa məlumat yoxdur.

Qeyd edək ki, avtomobilin etibarnamə statusu artıq ləğv edilib. Sürücünün adı və digər məlumatlar barədə yaxın vaxtlarda əlavə məlumat veriləcəyi gözlənilir.

Məsələ ilə bağlı DİN-nin mətbuat xidmətindən bildirilib ki, hadisə ilə əlaqədar araşdırma aparılır.