Berlində kütlənin üzərinə avtomobil sürən şəxsin kimliyi məlum oldu

Berlində insanların üzərinə avtomobil sürən şübhəlinin şəxsiyyəti müəyyənləşdirilib.

Avtosfer.az xəbər verir ki, bu barədə DPA agentliyi hüquq-mühafizə orqanlarındakı mənbələrə istinadən məlumat yayıb.

Məlumata görə, polis hücumda şübhəli bilinən şəxsi müəyyən edib. Bildirilir ki, həmin şəxs hüquq-mühafizə orqanlarına əvvəldən tanış olub və ehtimal olunur ki, Berlin şəhərində fəaliyyət göstərən islamçı çevrələrlə əlaqəsi var.

DPA-nın "X" sosial şəbəkəsində yaydığı məlumatda deyilir:

"Polis hücumda şübhəli bilinən şəxsin kimliyini müəyyənləşdirib. Hüquq-mühafizə orqanlarının məlumatına görə, həmin şəxs onlara əvvəldən məlum olub və ehtimal ki, Berlinin islamçı mühiti ilə əlaqəlidir".

***

Almaniyanın paytaxtı Berlinin mərkəzində yerləşən Tirqarten parkı ərazisində yüksək sürətlə hərəkət edən avtomobil bir qrup insanın üzərinə sürülüb.

Avtosfer.az xəbər verir ki, bu barədə "Bild" qəzeti məlumat yayıb.

Hadisə şahidlərindən birinin sözlərinə görə, ağ rəngli furqon yüksək sürətlə parkın içərilərinə doğru hərəkət edib və insanlara çırpılıb.

Polis bir nəfərin öldüyünü, 14 nəfərin yaralandığını bildirib.

Hazırda hadisənin səbəbləri müəyyənləşdirilir. Sürücü hadisə yerindən qaçıb.

Əraziyə çoxlu sayda təcili yardım briqadaları cəlb olunub.

Bildirilib ki, hadisə LGBT yürüşünün keçirildiyi vaxt baş verib. Hazırda polis hadisənin təsadüfi qəza, yoxsa qəsdən törədilmiş əməl olub-olmadığını araşdırır.