Binəqədidə DƏHŞƏTLİ HADİSƏ - ÖLƏNLƏR VAR - YENİLƏNİB

Bakının Binəqədi rayonu, İncəçay küçəsində baş verən dəhşətli hadisəsinin təfərrüatı məlum olub. .

Hadisə ailə münaqişəsi zəminində baş verib.

Məlumata görə, 1968-ci il təvəllüdlü Rafət Həsənov ailəsindən boşanıb və evi tərk edib. Evdə onun həyat yoldaşı, 1968-ci il təvəllüdlü Ceyran Həsənova və iki övladı (Bir oğlan, bir qız - red.) qalırmış. R.Həsənov bir neçə dəfə evə qayıtmaq istəsə də, qadın və iki övladı buna razılıq verməyiblər.

Bu gün günorta saatlarında övladlarının işdə olmasından istifadə edən R.Həsənov evə gəlib. O, C.Həsənovanın əl-qolunu zəncirlə bağlayaraq xüsusi amansızlıqla döyüb. R.Həsənov daha sonra qadını qətlə yetirib, evə gələn qaz xəttini açaraq qapı və pəncərələri bağlayıb.

O, bunun ardınca həyətə çıxaraq, oğluna məxsus BMW markalı avtomobilə od vurub, daha sonra həyətdəki yarımtikilidə özünü asıb. BMW markalı avtomobil yanarkən evə od düşüb və partlayış olub. Hadisə zamanı evə bitişik olan qonşu mənzil də tamamilə yanıb.

Məlumata görə, qətlə yetirilən C.Həsənova dərzi işləyirmiş./oxu.az

***15:53

Binəqədi rayonunda baş vermiş yanğın və ölüm faktları ilə bağlı cinayət işi başlanıb.

Avtosfer.az xəbər verir ki, bu barədə Baş Prokurorluq və Fövqəladə Hallar Nazirliyi birgə məlumat yayıb.

Bildirilib ki, aprelin 17-də saat 12 radələrində Bakı şəhəri, Binəqədi rayonu, Baksol yolu adlanan ərazidə yerləşən fərdi yaşayış evində baş verən yanğınla əlaqədar dərhal əraziyə Fövqəladə Hallar Nazirliyi Dövlət Yanğından Mühafizə Xidmətinin qüvvələri cəlb olunub.

Yanğınsöndürənlər tərəfindən yanğın söndürülərək daha geniş əraziyə yayılmasına imkan verilməyib.

Yanğın nəticəsində 1968-ci il təvəllüdlü Rafət Həsənova məxsus ümumi sahəsi 90 kvadratmetr olan birmərtəbəli dördotaqlı evin dam örtüyü, 2 otağının yanar konstruksiyaları 32 kv.m sahədə, bitişik sahəsi 66 kv.m olan talvar və evin həyətində park edilmiş BMW markalı minik avtomobili, yaxınlıqda yerləşən 1982-ci il təvəllüdlü Əziz Vəliyevə məxsus ümumi sahəsi 80 kv.m olan birmərtəbəli dördotaqlı evin dam örtüyü və 3 otağının yanar konstruksiyaları 46 kv.m sahədə yanıb.

Habelə yanğının kəşfiyyatı zamanı həyətyanı sahədə Rafət Həsənovun, evdə isə 1968-ci il təvəllüdlü Ceyran Həsənovanın meyitləri aşkar olunub.

Prokurorluq əməkdaşları tərəfindən icra olunan ilkin prosessual hərəkətlər nəticəsində Rafət Həsənovun şəxsi münasibətlər zəminində keçmiş arvadı Ceyran Həsənovanı qeyd olunan evdə qəsdən öldürməsi, ardınca həmin evi və həyətdə olan avtomobili yandırması və daha sonra isə həyətyanı sahədə intihar etməsinə əsaslı şübhələr müəyyən edilib.

Faktla bağlı Binəqədi Rayon Prokurorluğu tərəfindən Cinayət Məcəlləsinin 120.1 (qəsdən adam öldürmə) və 125-ci (özünü öldürmə həddinə çatdırma) maddələri ilə cinayət işi başlanıb.

Hazırda iş üzrə zəruri istintaq tədbirləri davam etdirilir.

***15:18

Bakının Binəqədi rayonunda dəhşətli ailə faciəsi baş verib.

Avtosfer.az xəbər verir ki, hadisə bu saatlarda Binəqədi rayonunun "Baksol yolu" adlanan ərazisində, İncəçay küçəsindəki yaşayış evlərindən birində qeydə alınıb. 

Həmin ərazidəki mənzillərdən birində yaşayan şəxs arvadını xüsusi amansızlıqla qətlə yetirib.

Məlumata görə, hadisəni törədən şəxs qətli törədəndən sonra qazı açıb. Nəticədə partlayış baş verib. Qətl törədən kişi də hadisə yerində ölüb.
 
Onların iki övladları olub, ikisi də hadisə zamanı işdə olub. Dəhşətli hadisə nəticəsində iki ev və avtomobil yanıb, bir evin isə partlayışın təsirindən dam örtüyü, pəncərələri yararsız hala düşüb.

Əraziyə hüquq-mühafizə orqanlarının əməkdaşları cəlb olunublar.(oxuaz)