Çində inanılmaz hadisə: Ölən qohumunun yanına "Mercedes" basdırdı

Çinin şimal-şərqində bir kişi vəfat etmiş qohumunun yanında "Mercedes-Benz S-Class" markalı avtomobilini basdırıb. Lakin bir sıra qanunları pozduğuna görə o, nəqliyyat vasitəsini sonradan qazdırıb çıxarmağa məcbur edilib.

Avtosfer.az xəbər verir ki, bu barədə Çin Milli Radiosu məlumat yayıb.

Ehtimal olunur ki, avtomobili basdıran şəxs mövhumatçı olub. Avtomobilin dövlət nömrə nişanında dörd ədəd səkkiz rəqəmi yer alıb. Çin mədəniyyətində səkkiz rəqəmi uğurlu hesab olunur. Bu səbəbdən səkkiz rəqəmi olan nömrələr adi nömrələrlə müqayisədə daha baha satılır və qiyməti bir neçə yüz min yuana qədər yüksələ bilir.

Məlumata görə, basdırılan avtomobilin dəyəri Çində təxminən 130 min yuan (19 min dollar) təşkil edir.

Qeyd olunur ki, kişi yol hərəkəti təhlükəsizliyi qaydalarını, meşələrlə bağlı qanunvericiliyi və dəfn mərasimlərinin təşkili ilə əlaqədar normaları pozub.