Elbrusda son beş gündə 7 nəfər öldü - YENİLƏNİB

"Düzgün planlamanın olmaması və əlverişsiz hava şəraiti ilə bağlı proqnoza lazımi reaksiyanın verilməməsi Elbrusda alpinistlərin faciəli ölümünə səbəb olub".

Avtosfer.az xəbər verir ki, bunu TASS agentliyinə açıqlamasında Rusiya Alpinizm Federasiyasının klassik alpinizm komissiyasının rəhbəri Aleksandr Yakovenko deyib.

"Bu faciədir. Aydındır ki, hava şəraitini və öz imkanlarını düzgün qiymətləndirməyiblər. Əcnəbi alpinistlər bu vəziyyətin öhdəsindən gələcəklərini düşündülər, öz imkanlarına uyğun seçim etmədilər.

Vəziyyəti adekvat təhlil edən Rusiya qrupları geri qayıtdılar. Lakin digərləri, həmçinin kifayət qədər təcrübəsi olan əcnəbi alpinistlər çətinliyi dəf edəcəklərini zənn edərək riskə gediblər".

Rusiya Fövqəladə Hallar Nazirliyindən verilən məlumata əsasən, xilasetmə qrupları Elbrusda həlak olan digər bosniyalı alpinistlərin də nəşlərini aşkar ediblər və hazırda onların dağdan endirilməsi üçün müvafiq işlər aparılır.

***23:00, 26 iyul

Elbrus dağında son beş gün ərzində baş verən qəzada yeddinci nəfər həlak olub.

Avtosfer.az xəbər verir ki, 5300 metr yüksəklikdə olan iki alpinistdən ibarət qrup kömək istəyib. İkinci şəxs yaralanıb və hazırda Fövqəladə Hallar Nazirliyi tərəfindən təxliyə olunur.

Dünən Bosniyadan olan beş alpinist dırmanış zamanı həlak olub; qrupdan yalnız ikisi sağ qalıb. Faciədən bir neçə saat əvvəl, pis hava şəraiti səbəbindən kömək istəyən turistlərin başqa bir qrupunu endirmək üçün dağa üç yürüşçü göndərilib.