Gəncədə peşə məktəbinin həyətində tələbənin meyiti tapıldı - YENİLƏNİB

12.01.2026-ci il tarixində saat 08:50 radələrində Respublika Təcili və Təxirəsalınmaz Tibbi Yardım Mərkəzinə Gəncə şəhərindən təcili çağırış qeydə alınıb.

Avtosfer.az xəbər verir ki, bu barədə TƏBİB məlumat yayıb.

Bildirilib ki, çağırış ünvanına dərhal təcili tibbi yardım briqadası cəlb olunub. 

Təcili tibbi yardım briqadası tərəfindən 2008-ci il təvvəllüdlü şəxsin (oğlan) həkiməqədər ölüm faktı qeydə alınıb. 

Ətrafdakıların təkidi ilə saat 09:10 radələrində Gəncə Şəhər Birləşmiş Xəstəxanasının nəzdində olan Abbas Səhhət adına xəstəxanaya hospitalizasiya həyata keçirilib. 

Həkim heyəti tərəfindən onun həkiməqədər ölüm faktı təsdiq olunub və aidiyyəti üzrə təhvil verilib.

***12:33

Gəncədə peşə məktəbinin həyətində tələbənin meyitinin tapılması ilə bağlı rəsmi araşdırma başlanıb.

Avtosfer.az xəbər verir ki, bu barədə Peşə Təhsili üzrə Dövlət Agentliyi məlumat yayıb.

"12 yanvar 2026-cı il tarixində Röyal Vüqar oğlu Bayramov səhər saatlarında təhsil aldığı Sənaye və Texnologiyalar üzrə Gəncə Dövlət Peşə Təhsil Mərkəzində olarkən səhhəti qəfil pisləşib və huşunu itirərək yıxılıb. Hadisə dərhal qeydə alınıb, o, təcili tibbi yardım briqadası tərəfindən xəstəxanaya çatdırılıb.

Lakin göstərilən tibbi müdaxilələrə baxmayaraq, onun həyatını xilas etmək mümkün olmayıb.

Faktla bağlı aidiyyəti dövlət qurumları tərəfindən müvafiq araşdırma aparılır.

Hadisənin təfərrüatı araşdırmanın nəticələrinə uyğun olaraq ictimaiyyətə açıqlanacaq", - deyə bildirilib.

***11:36

Gəncədə yeniyetmənin meyiti tapılıb.

Avtosfer.az APA-ya istinadən xəbər verir ki, hadisə şəhərdə yerləşən peşə məktəblərinin birinin həyətində qeydə alınıb.

Bu gün səhər saatlarında peşə məktəbinin həyətində 2008-ci il təvəllüdlü R.Bayramovun meyiti aşkarlanıb.

Onun peşə məktəbinin tələbəsi olduğu bildirilir. Hadisə yerinə polis və prokurorluq əməkdaşları cəlb ediliblər.

İlkin məlumata görə, 18 yaşlı gənc ürək çatışmazlığından vəfat edib.

Faktla bağlı araşdırma aparılır.