Gürcüstanda azərbaycanlı ata və oğlu güllələndi - YENİLƏNİB

Gürcüstanda azərbaycanlıların yığcam yaşadıqları Marneuli şəhərinin bazarında baş verən silahlı insident ölümlə nəticələnib.

Avtosfer.az 24News.ge-yə istinadən xəbər verir ki, yaralı vəziyyətdə xəstəxanaya çatdırılan 27 yaşlı gənc tibbi müdaxilələrə baxmayaraq, "Aversi" klinikasında həyatını itirib.

Məlumata əsasən, gəncin ölüm xəbərindən sonra klinikada qarşıdurma yaranıb, bununla əlaqədar hadisə yerinə hüquq-mühafizə orqanlarının əməkdaşları gəliblər və insanları çölə çıxarıblar.

Mövcud məlumata əsasən, güllə yarası alan atanın vəziyyəti isə stabildir. Hadisənin başvermə səbəbləri və təfərrüatı araşdırılır.

Faktla bağlı Cinayət Məcəlləsinin 19-109-cu maddəsi üzrə istintaq aparılır. Sözügedən maddə qəsdən adam öldürməyə cəhd hallarını nəzərdə tutur.

***20:13
Bu gün günorta saatlarında Marneuli mərkəzi bazarının qızıl məmulatları satılan hissəsində silahlı insident qeydə alınıb.

Avtosfer.az xəbər verir ki, qızıl mağazasının sahibi olan azərbaycanlı ata və onun oğlu naməlum şəxs tərəfindən güllələnib.

Hücum edən şəxs bir neçə dəfə atəş açdıqdan sonra hadisə yerindən qaçıb.

Yaralı ata və oğlu Marneulidə yerləşən klinikalardan birinə yerləşdirilib. Hadisənin səbəbləri və digər təfərrüatları hazırda məlum deyil.

Gürcüstan DİN-dən bildirilib ki, faktla bağlı istintaqa başlanılıb.