“Hyundai”da oturacaq 2 yaşlı uşağın ölümünə səbəb oldu; minlərlə avtomobil geri çağrıldı - VİDEO

ABŞ-da Hyundai Palisade avtomobili ilə bağlı baş verən faciəli hadisə beynəlxalq səviyyədə ciddi rezonans doğurub. Hadisədən sonra bir sıra ölkələrdə, o cümlədən Qazaxıstanda da bu modellə bağlı yoxlamalara başlanılıb. Avtosfer.az-ın “BakuNews.az”a istinadən məlumatına görə, insident martın 7-də ABŞ-ın Ohayo ştatında qeydə alınıb. İlkin ehtimallara əsasən, 2026-cı il istehsalı olan Hyundai Palisade modelində avtomatik qatlanan oturacaq gözlənilmədən işə düşüb. Bu zaman oturacaqda olan 2 yaşlı uşaq sıxılaraq nəfəs almaqda çətinlik çəkib və təəssüf ki, onun həyatını xilas etmək mümkün olmayıb.

Hadisə geniş ictimai narazılıq doğurduqdan sonra Hyundai Motor Company Şimali Amerikada bu modelin satışını müvəqqəti dayandırıb. Eyni zamanda, şirkət təhlükəsizlik sistemlərinin yoxlanılması və təkmilləşdirilməsi məqsədilə 69 mindən çox avtomobili geri çağırdığını açıqlayıb.

Baş verənlər Qazaxıstanda da diqqətdən kənarda qalmayıb. Hyundai Auto Kazakhstan ölkədə servis kampaniyasına start verildiyini elan edib. Kampaniya çərçivəsində avtomobillərin texniki vəziyyəti yoxlanılır və mümkün risklər aradan qaldırılır.

Eyni zamanda, tanınmış avto-bloger Kuanlıq Magzamov sözügedən mexanizmin real şəraitdə necə işlədiyini yoxlamaq üçün praktiki test aparıb. Bu addım həm sürücülərin məlumatlandırılması, həm də təhlükəsizlik məsələlərinin aktuallığını bir daha gündəmə gətirib.

Mütəxəssislər bildirirlər ki, müasir avtomobillərdə tətbiq edilən avtomatik sistemlər sürücülər üçün rahatlıq yaratsa da, onların düzgün işləməsi və təhlükəsizlik standartlarına uyğunluğu daim nəzarətdə saxlanılmalıdır. Bu hadisə isə bir daha göstərdi ki, texnoloji yeniliklərlə yanaşı, təhlükəsizlik məsələləri hər zaman prioritet olmalıdır.