İran Küveyt hava limanını vurdu - Ölən var - VİDEO - YENİLƏNİB

Küveytin aviasiya qurumları ölkənin hava məkanını yalnız iki daşıyıcı - "Jazeera Airways" və "Kuwait Airways" üçün açıb. Digər aviaşirkətlər üçün isə uçuş qadağası hələ də qüvvədədir.

Avtosfer.az xəbər verir ki, bu barədə TASS-a Yaxın Şərqin aviadaşıma xidmətlərindəki mənbə məlumat verib.

"Küveyt səması "Jazeera Airways" və "Kuwait Airways" təyyarələri üzünə açılıb, onların uçuşları üçün bir sıra nəzarət nöqtələri və dəhlizlər müəyyən edilib", - deyə mənbə bildirib.

Qeyd edilib ki, digər aviaşirkətlər üçün hava məkanı iyunun 4-ü, cümə axşamı ümumdünya vaxtı ilə saat 12:00-a (Bakı vaxtı ilə 16:00) qədər bağlı qalacaq. Həmçinin, bu iki şirkətə ehtimal olunan gecikmələr və ya başqa hava limanlarına yönləndirmə halları üçün əlavə yanacaq ehtiyatına malik olmaları tələbi barədə xəbərdarlıq edilib.

Bundan əvvəl əmirliyin Mülki Aviasiya Baş İdarəsi beynəlxalq hava limanının terminalının İrandan atılan raketlər və pilotsuz uçuş aparatlarının hücumuna məruz qaldığını açıqlamışdı. Rəsmilər bütün uçuşların dayandırılması və gələn reyslərin digər aeroportlara istiqamətləndirilməsi barədə qərar qəbul etmişdilər.

Əmirliyin Səhiyyə Nazirliyinin məlumatına görə, İranın Küveytə endirdiyi zərbələr nəticəsində ən azı 63 nəfər xəsarət alıb.

Qurumun bəyanatında qeyd olunur ki, 3 iyun çərşənbə günü baş verən hücum nəticəsində aeroport işçiləri və sərnişinlər də daxil olmaqla onlarla insan yaralanıb.

Küveyt Xarici İşlər Nazirliyinin məlumatına əsasən, bir nəfər aldığı ağır xəsarətlərdən həyatını itirib.

***13:53

İran Küveyt hava limanına pilotsuz uçuş aparatları ilə zərbə endirib.

Avtosfer.az xarici mətbuata istinadən xəbər verir ki, bu barədə Küveyt Müdafiə Nazirliyinin bəyanatında deyilir. 

Nazirliyin rəsmi nümayəndəsi Səud əl-Ətvan dronların hava limanının birinci terminalında yerləşən sərnişin zalına hücum etdiyini bildirib.

“Binaya ciddi maddi ziyan dəyib, bir neçə nəfər yaralanıb ki, onlara lazımi tibbi yardım göstərilib”, - o deyib.

Hadisə ilə bağlı aeroportun fəaliyyəti dayandırılıb, uçuşlar təxirə salınıb, təyyarələr alternativ hava limanlarına yönləndirilib.

Xatırladaq ki, daha əvvəl İran İslam İnqilabı Keşikçiləri Korpusu ABŞ-nin Qəşm adasına hücumuna cavab olaraq Küveytdə yerləşən ABŞ hərbi bazalarını raketlərlə hədəfə aldığını bəyan edib.

***11:23

TASS-ın öz mənbələrinə istinadən yaydığı məlumata görə, hücumla əlaqədar Küveyt ölkənin hava məkanını bir sutkalıq bağlayıb. 

***

Küveyt Xarici İşlər Nazirliyinin yaydığı məlumata görə, İranın Küveyt Beynəlxalq Hava Limanına həyata keçirdiyi raket və dron hücumu nəticəsində bir nəfər ölüb.

Küveyt tərəfi hücumlara cavab vermək hüququnu özündə saxladığını bəyan edib.