İsrail SEPAH-ın "Mi-17" helikopterini vurdu - VİDEO

İsrail təyyarəsi İranın qərbindəki Sənəndəc hava limanında İslam İnqilabı Keşikçiləri Korpusuna (SEPAH) məxsus "Mi-17" helikopterini vurub.

Avtosfer.az xəbər verir ki, bu barədə İsrail Müdafiə Qüvvələrinin (SAXAL) mətbuat xidməti məlumat yayıb.

"Dəqiq kəşfiyyat məlumatları əsasında İsrail Hərbi Hava Qüvvələrinə məxsus təyyarə Həmədandakı Sənəndəc hava limanında SEPAH-a məxsus "Mi-17" helikopterini aşkar edərək vurub", - deyə SAXAL-dan bildirilib.

 
Mətbuat xidməti, həmçinin bildirib ki, İsrail SEPAH-ın Hərbi Hava Qüvvələrinin döyüş qabiliyyətini zəiflətməyə və İranın qərbində hava üstünlüyünü genişləndirməyə davam edir.

Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.

İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.

Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.

İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.