İsrail son əməliyyatlar zamanı Livanda 40 il öncə əsir düşmüş pilotunu TAPDI? - Açıqlama - YENİLƏNİB

İsrail Müdafiə Qüvvələrinin (SAXAL) xüsusi təyinatlı qüvvələri 1986-ci ildə itkin düşən pilot Ron Aradın qalıqlarını tapmaq üçün Livanda keçirilən gecə əməliyyatı zamanı heç bir itki verməyib.

Avtosfer.az-ın xəbərinə görə, bu barədə SAXAL-ın mətbuat xidməti məlumat yayıb.

"Livandakı əməliyyatın bir hissəsi olaraq, xüsusi təyinatlı qüvvələr gecə vaxtı itkin düşmüş pilot Ron Aradın axtarışlarını aparıblar. İsrail Müdafiə Qüvvələrinin şəxsi heyəti arasında xəsarət alanlar olmayıb", - deyə məlumatda qeyd olunub.

SAXAL-dan verilən xəbərə görə axtarış yerində itkin düşmüş Ron Arada aid heç bir iz aşkar edilməyib.

***

İsrailin komando bölməsi 1986-cı ildə əsir götürülən pilot Ron Aradın qalıqlarını tapmaq və geri qaytarmaq üçün Livanın şərqindəki dağlıq bölgəyə eniş edib.

Avtosfer.az xəbər verir ki, bu barədə "Əl-Hədat" televiziyası məlumat yayıb.

Kanalın məlumatına görə, İsrail hərbçiləri Nəbi Şit şəhəri yaxınlığına eniş edərək İsrail pilotunun qalıqlarının dəfn olunduğu qəbiristanlığa doğru gediblər. Lakin onlar orada pusquya düşüblər və geri qayıtmağa məcbur olublar.

"Hizbullah" hərəkatı qırıcılarının "Əl-Şokr" qəbiristanlığı yaxınlığında İsrail bölməsinə hücuma keçdiyini təsdiqləyib.

"Düşmən bölməsi aşkar edildikdən sonra onların döyüş zonasından geri çəkilmələri üçün təyyarələr və helikopterlərdən istifadə edərək zərbələr endirilib", - deyə hərəkatın bəyanatında qeyd olunub.

Xatırladaq ki, İsrail Hərbi Hava Qüvvələrinin şturmanı Ron Arad 16 oktyabr 1986-cı ildə döyüş tapşırığı zamanı Livan üzərində "F-4 Phantom" təyyarəsi vurulduqdan sonra əsir götürülüb. Ehtimala görə, o, 1988-ci ilin may ayında əsirlikdə olarkən güllələnib.