Lüks elektromobil yandı: qapılar açılmadığı üçün sürücü ÖLDÜ - VİDEO

Çində ötən gecə baş vermiş qəza dünyanın aparıcı avtomobil saytlarının diqqət mərkəzindədir. 

Avtosfer.az xəbər verir ki, Çendu əyalətində “Xiaomi SU7 Ultra” elektromobili yolayrıcı səddə çırpılaraq alışıb. Hadisəni təhlükəsizlik kameraları qeydə alıb. 

Qəza zamanı bir neçə sürücü yanan avtomobildəkiləri xilas etmək üçün dayanıb. Onların qapını açmaq və şüşələri sındırmaq cəhdləri fayda verməyib. Məlum olub ki, qəza anında qapı kilidləri dövrədən ayrılmayıb. Yanğınsöndürənlər qapını xüsusi alətlərlə açdıqda isə artıq gec idi. Sürücünün meyiti artıq kömürləşmişdi. 

İlkin ehtimala görə qapıların kilidli qalmasına səbəb tam elektrikli, mexaniki yolla açmaq mümkün olmayan qapı dəstəkləridir (gizli qapı tutacaqları). Fakt təsdiqlənərsə bu cür qapı dəstəklərinin qadağan edilməsi vaxtı geri çəkiləcək. Yanan avtomobil 2025-ci ilin istehsalıdır.

Qeyd edək ki, bu, “Xiaomi SU7 Ultra” elektromobilində ilk belə qəza deyil. Mayda baş verən analoji qəzada 3 nəfər yanaraq ölmüşdü. Bundan sonra şirkət 100 mindən çox avtomobili geri çağıraraq proqram təminatını dəyişib.

“Xiaomi SU7 Ultra” 1500 at gücündə elektrik mühərriki ilə təchiz edilir. “Porsche Taycan”ın bənzəri olan elektromobil Çində lüks hersab edilir. 
Bu qəzadan sonra “Xiaomi”nin Honkonq birjasındakı indeksləri 9 faiz geriləyib.

Vüqar