Metro stansiyaların fəaliyyəti tam bərpa edildi - RƏSMİ - YENİLƏNİB

Bakı metropoliteninin fəaliyyəti bərpa olunub. Xətlər üzrə qatarlararası intervallar qorunmaqla hərəkət tam təmin edilib.

Bu barədə Avtosfer.az-a "Bakı Metropoliteni" QSC-dən bildirilib.

"Yaranmış narahatlığa görə sərnişinlərdən bir daha üzr istəyir, göstərilən anlayışa görə təşəkkür edirik", - deyə məlumatda qeyd olunub.

***14:53

Bakı metropoliteninin fəaliyyəti saat 15:00-da bərpa ediləcək.

Avtosfer.az xəbər verir ki, bu barədə "Bakı Metropoliteni" QSC-nin Mətbuat Xidmətindən məlumat verilib.

***13:11

Hazırda təmas relsinə yüksək gərginliyin verilməsində yaranmış nasazlığın aradan qaldırılması istiqamətində operativ tədbirlər görülür.

Avtosfer.az xəbər verir ki, yaxın bir saat ərzində metropolitenin fəaliyyəti bərpa ediləcək.

Yaranmış narahatlığa görə sərnişinlərdən üzr istəyir, göstərilən anlayış üçün təşəkkür edirik.

***12:56

"Qara Qarayev–Nərimanov" mənzilində tuneldə qalan qatarlardan sərnişinlərin evakuasiyası təhlükəsiz şəkildə həyata keçirilib.

Avtosfer.az xəbər verir ki, texniki nasazlığın aradan qaldırılması istiqamətində tədbirlər davam etdirilir.

***12:33

Bakı metropoliteninin bütün stansiyalarında sərnişinlərin girişinə müvəqqəti məhdudiyyət tətbiq edilib.

Avtosfer.az xəbər verir ki, bu barədə "Bakı Metropoliteni" QSC-dən açıqlama verilib. Məlumatda qeyd edilib ki, bu gün saat 12:10 radələrində “Ulduz–Nərimanov” mənzilində təmas relsinə yüksək gərginliyin verilməsində nasazlıq yaranıb. Baş verən texniki problem səbəbindən təhlükəsizlik tədbirləri gücləndirilib.

Hazırda “Ulduz” və “Nərimanov” stansiyalarında sərnişinlərin təxliyəsi həyata keçirilir. Eyni zamanda, qatarların “Nərimanov–Əhmədli” istiqamətində hərəkəti məhdudlaşdırılıb.

Məlumata əsasən, yaranmış nasazlığın aradan qaldırılması və elektrik gərginliyinin bərpası istiqamətində müvafiq tədbirlər görülür.

Metro əməkdaşları və sərnişinlərin həyatı üçün hər hansı təhlükə qeydə alınmayıb.

Hazırda texniki nasazlığın aradan qaldırılması istiqamətində tədbirlər davam etdirilir.