Moskvada öldürülən baykerin ailəsi Abbasovlara verilən cəzadan narazıdır

Moskvada öldürülən bayker Kirill Kovalevin valideynləri məhkəmənin hökmündən apellyasiya şikayəti vermək niyyətindədirlər. Avtosfer.az "Teleqraf"a istinadən xəbər verir ki, bu barədə "RİA Novosti"yə ailənin nümayəndəsi Denis Kovalev bildirib. "Biz məhkəmənin hökmündən narazıyıq və ondan apellyasiya şikayəti verəcəyik", - agentliyin mənbəsi bildirib.

O, əlavə edib ki, qətldə əli olanların hamısı həbs edilməlidir.

Qeyd edək ki, məhkəmənin hökmünə əsasən qətli törədən azərbaycanlı Şahin Abbasov 17 il, qardaşları Şöhrətə 12 il, İsaxan isə 6 il azadlıqdan məhrum ediliblər. Onların atası Nizam Abbasov təqsirsiz hesab edilərək məhkəmə zalından azadlığa buraxılıb. Digər iki təqsirləndirilən şəxs isə istintaq təcridxanasında cəza çəkdikdən sonra sərbəst buraxılıblar.

Xatırladaq ki, 2024-cü il aprelin 17-də axşam saatlarında Azərbaycan vətəndaşı 21 yaşlı Şahin Abbasov avtomobilini Krasnodarskaya küçəsində yerləşən binanın qarşısındakı səkidə saxlayıb. 24 yaşlı yerli sakin, bayker Kirill Kovalev ona irad tutub. Daha sonra o, Kovalevi bıçaqlayaraq hadisə yerindən qaçıb. İşğal altındakı Luqanska qaçmaq istəyən Abbasovlar Rostov vilayətinin Kazanskaya kəndində saxlanılıblar.

Sonradan məlum olub ki, yol polisi inspektoru Dmitri Bovtunov cinayət yerindən qaçan Şahin Abbasovu 30 min rubl müqabilində sərbəst buraxıb.