Parkinq ərazisində araba saxladı, bələdçini döydü - Məhkəmə qərarı

Bakıda avtomobil dayanacağında yük arabası saxlayan şəxslə bələdçi arasında dava düşüb. Avtosfer.az-ın "Qaynarinfo"ya istinadən məlumatına görə, hadisə Bakı şəhəri, Nizami rayonu, Qara Qarayev pospekti 126 ünvanın yaxınlığında baş verib.

Belə ki, 1988-ci ildə Göygöl rayonunda anadan olmuş Elçin Məmmədov (soyad şərti) yük arabasını həmin ünvandakı avtomobil parklanma ərazisində saxlayıb. "AzParking" şirkətində bələdçi işləyən Zaur adlı zərərçəkmiş Elçinə irad bildirərək, arabanı başqa yerdə saxlamasını tövsiyə edib. Təqsirləndirilən şəxs isə ona yorulduğunu, birazdan gedəcəyini deyib və tərəflər arasında yaranan mübahisə davaya çevrilib. Elçin "AzParking"in bələdçisinin döş qəfəsi nahiyəsinə yumruqla vuraraq xəsarət yetirib. Hadisədən sonra saxlanılan təqsirləndirilən şəxsə Cinayət Məcəlləsinin 221.1-ci maddəsi cinayət işi açılıb və işə məhkəmədə baxılıb. Məhkəmənin hökmü ilə Elçin Məmmədov 1200 manat cərimə edilib.