Patrul avtomobilinin yaxınlığında partlayış oldu – 2 ölü, 4 yaralı

Pakistanın cənub-qərbində Bəlucistan əyalətinin Kəlat rayonunda bomba partlayışı nəticəsində iki təhlükəsizlik əməkdaşı ölüb, dörd nəfər yaralanıb.

Avtosfer.az xəbər verir ki, bu barədə “Xinhua” təhlükəsizlik xidmətindəki mənbəyə istinadən məlumat yayıb.

Onun sözlərinə görə, partlayış rayonun Manqoçar bölgəsinin Coban kənd ərazisində patrul xidməti aparan təhlükəsizlik əməkdaşlarını daşıyan avtomobilin yanında baş verib.

Təhlükəsizlik qüvvələri və xilasetmə komandaları hadisə yerinə gəlib, ölənlərin cəsədlərini və yaralıları yaxınlıqdakı xəstəxanaya çatdırıblar.

Mənbə bildirib ki, hücum naməlum şəxslər tərəfindən məsafədən idarə olunan özəl hazırlanmış partlayıcı qurğudan istifadə edilərək həyata keçirilib.

Hələlik heç bir qruplaşma hücuma görə məsuliyyəti öz üzərinə götürməyib.