Prospektdə təhlükə yaradan piyada maşına çırpılmaqdan son anda xilas oldu - VİDEO

Paytaxtın Neftçilər prospektində piyadanın yol hərəkəti qaydalarını pozması təhlükəli vəziyyət yaradıb.

Avtosfer.az-ın məlumatına görə, hadisə mayın 19-da axşam saatlarında qeydə alınıb. Kadrlardan aydın olur ki, orta yaşlı kişi nəqliyyatın intensiv hərəkət etdiyi prospektdə yolu müəyyən olunmamış hissədən keçməyə çalışıb. Bu zaman o, ən sağ zolaqda hərəkətdə olan avtomobilin qarşısına çıxaraq qəza şəraiti yaradıb.

Sürücü təhlükəni vaxtında hiss etdiyi üçün ani manevr edərək avtobus zolağına keçib və mümkün toqquşmanın qarşısını son anda ala bilib. Hadisə zamanı digər nəqliyyat vasitələrinin hərəkəti də qısa müddətlik risk altında qalıb.

Xatırladaq ki, yüksək sürət rejiminin tətbiq olunduğu prospekt və magistral yollarda piyadaların yolu təyin edilməmiş yerdən keçməsi ən ağır nəticələrə səbəb olan qayda pozuntularından hesab olunur. Belə ərazilərdə sürücünün əyləcə reaksiya müddəti saniyələrlə ölçüldüyündən, bir addımlıq ehtiyatsızlıq həm piyadanın, həm də digər hərəkət iştirakçılarının həyatı üçün ciddi təhlükə yaradır.

Nərmin