Qaçırdığı avtomobili söküb internetdə satışa çıxardı; cinayət işi açıldı - FOTOLAR

Qadına məxsus avtomobili oğurlayıb metal qəbulu məntəqəsində hissələrə ayırıb internetdə satan şəxsə cinayət işi açılıb.

Avtosfer.az xəbər verir ki, hadisə Rusiyanın Tver vilayətində baş verib. Bu barədə Rusiya Daxili İşlər Nazirliyinin regional qrupunun Telegram kanalında məlumat verilib.

Bildirilib ki, Maksatikha kəndinin 33 yaşlı sakini Revolyusionnaya küçəsindəki bir evin həyətində park edilmiş  56 yaşlı moskvalı qadına məxsus “Skoda Rapid” avtomobili oğurlayıb. Əvvəllər məhkum edilmiş şübhəli avtomobili daşımaq üçün evakuator icarəyə götürərək metal qəbulu məntəqəsinə aparıb. Avtomobilin hissələrini yavaş-yavaş sökən cinayətkar daha sonra onlayn satışa çıxarıb.

Zərərçəkənin şikayətindən sonra hərəkətə keçən polis əməkdaşları avtomobili və cinayətkarı aşkarlayıblar. Qadının ziyanı 12.926 manat qiymətləndirilib.

Oğurlanmış avtomobil müsadirə edilərək xüsusi dayanacağa yerləşdirilib.

Hazırda oğurluq maddəsi ilə cinayət işi açılıb, istintaq davam edir.

Namiq Musayev