Qadın sürücü ona cərimə yazan polisə qələm atdı, görün necə saxlanıldı

ABŞ-da bir qadının yol polisi ilə mübahisə zamanı ona qələm atmasından sonra sərt şəkildə saxlanılması böyük etiraz doğurub.

Avtosfer.az türk mediasına istinadən xəbər verir ki, hadisə polis əməkdaşının kamerasına yansıyıb və görüntülər sosial şəbəkələrdə geniş müzakirələrə səbəb olub.

Məlumata görə, kimliyi açıqlanmayan qadın sürücü ona cərimə yazan polis əməkdaşı ilə sözlü mübahisə edib. Mübahisə zamanı qadın əlindəki qələmi polisə tərəf atıb. Bundan sonra polis sürücüyə dərhal müdaxilə edərək onu avtomobildən endirib, yerə yatırıb və qandallayaraq saxlayıb.

Görüntülərdə qadının saxlanılarkən "Mənim qayğısına qalmalı olduğum uşaqlarım var, onları tək qoya bilmərəm" dediyi, lakin polisin bu sözlərə məhəl qoymadığı əks olunub.

Kadrlardan sonra sosial mediada çoxsaylı istifadəçi qadının polis üçün real təhlükə yaratmadığını bildirərək, hüquq-mühafizə orqanının əməkdaşını "yersiz güc tətbiq etməkdə" ittiham edib. Hadisə ABŞ-da polis zorakılığı və səlahiyyətlərindən sui-istifadə mövzusunda yenidən mübahisələrə yol açıb.