“Təcili yardım hadisə yerinə 38 dəqiqəyə gəlib” - Avtobusun vurduğu piyada ölüb

Bakıda ölümlə nəticələnən yol-nəqliyyat hadisəsi törətməkdə təqsirləndirilən avtobus sürücüsü barəsində məhkəmə hökmü elan edilib.

Avtosfer.az "Teleqraf"a istinadən xəbər verir ki, hadisə paytaxtın Hövsan qəsəbəsində baş verib.

132 saylı xətt üzrə hərəkət edən marşrut avtobusu yola çıxan piyadanı vurub. Nəticədə 37 yaşlı Zaur adlı piyada aldığı xəsarətlərdən hadisə yerində vəfat edib. Faktla bağlı avtobus sürücüsü A. Məmmədov cinayət məsuliyyətinə cəlb olunub.

Məhkəmə istintaqı zamanı müəyyən edilib ki, sürücü ilə mərhumun ailə üzvləri arasında barışıq əldə olunub. Şahidlərin və sürücünün ifadələrinə görə, təcili tibbi yardım avtomobili hadisə yerinə çağırışdan 38 dəqiqə sonra gəlib. Gecikmənin səbəbi kimi yolların bağlı olması göstərilib.

Məhkəmənin hökmü ilə sürücü 3 il 9 ay müddətinə azadlıqdan məhrum edilib. O, cəzasını məntəqə tipli cəzaçəkmə müəssisəsində çəkəcək.

Qeyd edək ki, 132 saylı xətt üzrə hərəkət edən marşrut avtobusu “Kral-Transport” MMC-yə məxsusdur.