Tərcüməçi Ziya Muradov dağ yürüşündə ÖLDÜ - YENİLƏNİB

Tərcüməçi Ziya Muradovun ölümü ilə bağlı Quba rayon prokurorluğunda araşdırma aparılır.

Bu barədə Avtosfer.az-a Baş Prokurorluğun Mətbuat xidmətindən məlumat verilib.

Bildirilib ki, hadisənin bütün hallarının, o cümlədən Ziya Muradovun ölümünün səbəbinin və başvermə şəraitinin müəyyən edilməsi istiqamətində zəruri prosessual hərəkətlər həyata keçirilir.

Toplanmış materialların nəticələrinə əsasən hadisəyə qanunvericiliyin tələblərinə uyğun hüquqi qiymət veriləcəkdir.

***10:48

"Qanun" nəşriyyatının tərcüməçisi Ziya Muradovun ölüm səbəbi məlum olub.

Avtosfer.az Lent.az-a istinadən bildirir ki, mərhum Ziya Muradov ürək çatışmazlığından dünyasını dəyişib.

Qeyd edək ki, hadisə avqustun 2-də Qubanın Xanagah kəndi ərazisində, dağ yürüşü zamanı baş verib.

Hazırda faktla bağlı prokurorluq tərəfindən araşdırmalar davam etdirilir.

***

"Qanun" nəşriyyatının tərcüməçisi Ziya Muradovun ölümü ilə bağlı xəbər yayılıb.

Avtosfer.az Lent.az-a istinadən xəbər verir ki, Ziya Muradov Quba ərazisində 17 nəfərlik turist qrupu ilə dağ yürüşündə olarkən həyatını itirib.

Ziya Muradovun bacısı Aytən xanım bildirib ki, hazırda Parisdə yaşayır və qardaşının ölüm xəbərini aldıqdan sonra ailəsinin yaşadığı Qazax şəhərinə gedib.

Onun sözlərinə görə, ailə Ziya Muradovun ölümünün bəzi məqamlarının müəmmalı olduğunu düşünür və hadisənin araşdırılması üçün aidiyyəti qurumlara müraciət edib.

Mərhumun bacısı, həmçinin Ziya Muradovun ölüm səbəbinin dəqiq müəyyənləşdirilməsi məqsədilə onun qəbrinin eksqumasiya olunmasını istədiklərini bildirib.