“TikTok”da hədiyyə və baxış üçün özlərini təhlükəyə atırlar - XƏBƏRDARLIQ - VİDEO

Sosial şəbəkələrdə daha çox baxış toplamaq, canlı yayımlarda "jeton" və digər virtual hədiyyələr qazanmaq istəyi bəzi yeniyetmələri həyatlarını təhlükə altına atan hərəkətlərə sövq edir.

Avtosfer.az xəbər verir ki, son günlər sosial şəbəkələrdə yayılan görüntülərdə yeniyetmələrin axını güclü olan çaylara, su kanallarına və digər təhlükəli su hövzələrinə, xüsusilə də körpülərin üzərindən tullanaraq bunu videoya çəkdikləri müşahidə olunur. Həmin görüntülərin daha sonra sosial platformalarda paylaşılması və izləyici toplamaq məqsədi daşıdığı bildirilir.

Mütəxəssislərin fikrincə, bu cür davranışlar son dərəcə təhlükəlidir. Suyun dərinliyinin əvvəlcədən məlum olmaması, suyun altında beton konstruksiyalar, metal hissələr və digər maneələrin yerləşməsi, eləcə də güclü axının insanı nəzarətsiz şəkildə aparması hər an ağır xəsarət və ya faciə ilə nəticələnə bilər.

Bundan əlavə, təhlükəli hərəkətlərin sosial şəbəkələrdə sürətlə yayılması digər yeniyetmələrin də eyni davranışı təkrarlamasına səbəb olur. Belə hallarda bir anlıq populyarlıq arzusu geri dönüşü olmayan nəticələr doğura bilər.

Mütəxəssislər valideynləri övladlarının internetdə izlədiyi məzmunlara, qoşulduqları trendlərə və asudə vaxtlarını harada keçirdiklərinə daha ciddi nəzarət etməyə çağırırlar. Bildirilir ki, uşaqlarla mütəmadi söhbət aparılması, onlara bu cür riskli davranışların mümkün nəticələrinin izah edilməsi və təhlükəsizlik qaydalarının aşılanması bu kimi hadisələrin qarşısının alınmasında mühüm rol oynayır.

Eyni zamanda vurğulayırlar ki, sosial şəbəkələrdə qısa müddətli məşhurluq naminə həyatı riskə atmaq heç bir halda qəbulolunan davranış deyil və təhlükəsizlik hər zaman baxış sayından daha önəmli olmalıdır.

Eltac Zülfüqaroğlu