Toya çatmaq üçün təyyarənin arxasınca qaçdılar - VİDEO

Rusiyanın Moskva şəhərindəki Şeremetyevo hava limanında iki qadın sərnişin uçuşa hazırlaşan təyyarəyə çatmaq üçün çamadanları ilə birlikdə uçuş-enmə zolağına qaçıb.

Avtosfer.az xəbər verir ki, “Aeroflot” aviaşirkətinin təyyarəsi hərəkətə başlayarkən qadınlar onun arxasınca qaçıblar.

Qadınların təyyarəni dayandırmaq cəhdi hava limanı əməkdaşlarının müdaxiləsi ilə başa çatıb. Təhlükəsizlik əməkdaşları və polis onları uçuş-enmə zolağından uzaqlaşdırıb. Təyyarə isə qısa müddət sonra hava limanını tərk edib.

Hadisədən sonra qadınların kimliyi və nə üçün belə addım atdıqları da məlum olub. Onların Türkiyə vətəndaşları olduğu və Bodrumda keçiriləcək bacılarının toyuna getdikləri müəyyənləşib.

Qadınlardan biri toyun Muğlanın Bodrum rayonunda keçiriləcəyini bildirib. Uçuşu qaçırmamaq üçün təyyarənin arxasınca qaçan qadınlar buna baxmayaraq təyyarəyə minə bilməyiblər.

Hadisə hava limanının təhlükəsizlik kameraları tərəfindən qeydə alınıb. Qadınlar saxlanıldıqdan sonra təhlükəsizlik qaydalarını pozduqları üçün barələrində inzibati tədbir görülüb və cərimələniblər.