Xəstəxana gözətçisindən 6500 manatlıq dələduzluq

Saatlı Rayon Mərkəzi Xəstəxanasının gözətçisi dələduzluq cinayətinə görə məhkum edilib. 

Avtosfer.az "Qaynarinfo"ya istinadən xəbər verir ki, Ülvi adlı gözətçi Saatlı sakinlərindən birinin oğlunu xəstəxananın təcili tibbi yardım şöbəsinə sürücü vəzifəsinə düzəldəcəyini vəd edib və bunun müqabilində həmin şəxsdən 5000 manat alıb. Lakin verdiyi vədi yerinə yetirməyib. Aldığı pulu isə şəxsi ehtiyaclarına xərcləyib. 

Bundan başqa, o, Ə.Həsənova adlı vətəndaşın pensiyasını bərpa etdirəcəyini deyərək vətəndaşın oğlundan 1500 manat pul alıb. Təbii ki, Ə.Həsənovaya verilən vəd də yerinə yetirilməyib. 

Tərəflər gözətçi barəsində polisə şikayət edib. Ülvi saxlanılıb və ona qarşı Cinayət Məcəlləsinin 178.2.2-ci maddəsi ilə ittiham irəli sürülüb. Cinayət işinə Saatlı Rayon Məhkəməsində hakim Vüqar Qasımovun sədrliyi ilə baxılıb. Məhkəmə zamanı Ülvi verilmiş ittiham üzrə özünü təqsirli bilib. 

Məhkəmənin hökmü ilə ona 2 il müddətinə azadlığın məhdudlaşdırılması cəzası təyin edilib. Onun şübhəli şəxs qismində saxlanıldığı 2 gün müddət 1 günə 2 gün hesabı ilə təyin edilmiş cəzadan çıxılıb və üzərində qəti olaraq 1 il 11 ay 26 gün müddətə azadlığın məhdudlaşdırılması cəzası saxlanılıb.