Yevlax sakini əsgərlikdən qayıdan həmkəndlisini maşınla vurub öldürdü

Yevlaxda sürücülük vəsiqəsi olmadan idarə etdiyi avtomobillə piyadanı vurub öldürməkdə təqsirləndirilən şəxsin cinayət işi üzrə məhkəmə prosesi başa çatıb. Avtosfer.az-ın Oxu.az-a istinadən məlumatına görə, Şəki Ağır Cinayətlər Məhkəməsinin hökmü ilə təqsirləndirilən Hidayət Məmmədov 5 il 6 ay azadlıqdan məhrum edilib. İttihama görə, hadisə Yevlax rayonunun Ərəş kəndində baş verib. Kənd sakini, 24 yaşlı Hidayət Məmmədov sürücülük vəsiqəsi olmadığı halda atasına məxsus "90-CL-503" dövlət qeydiyyat nişanlı "Mercedes-BENZ" markalı avtomobillə rayon ərazisində olan iş yerinə getmək üçün evdən çıxıb. O, Ərəş kəndi ərazisində hərəkətdə olarkən maqnitofona baxıb və diqqəti yoldan yayınıb. Bu an onun həmkəndlisi, hərbi xidmətdən yeni gələn Ələmdar Soltanov yolu keçmək istəyərkən Heydər onu vurub. O, Ə.Soltanovu xəstəxanaya çatdırsa da, onun həyatını xilas etmək mümkün olmayıb. Gənc oğlan qəzadan 6 gün sonra xəstəxanada dünyasını dəyişib.