Yeyib-içdikdən sonra tanışının maşınını qaçırdı, qəza törətdi - 40 minlik ziyan

Kafedə spirtli içki qəbul etdikdən sonra tanışının avtomobilini qaçıran şəxs həbs edilib.

Avtosfer.az "Qaynarinfo"a istinadla xəbər verir ki, hadisə Ağcabədi şəhərində baş verib.

Belə ki, təqsirləndirilən şəxs tanışı ilə kafedə yeyib-içdikdən sonra ona məxsus "Land Rover" markalı avtomobili sahibinin xəbəri və icazəsi olmadan götürərək idarə edib. Şəhər ərazisində hərəkətdə olarkən o, qarşıda hərəkət edən avtomobillə toqquşub. Nəticədə nəqliyyat vasitəsinə 39 460 manat məbləğində maddi ziyan dəyib.

İstintaqla müəyyən olunub ki, təqsirləndirilən şəxs avtomobili talama məqsədi olmadan müvəqqəti istifadə etmək üçün qanunsuz ələ keçirib. Məhkəmə iclasında o, ittiham üzrə özünü təqsirli bilib. Bildirib ki, hadisə zamanı sərxoş vəziyyətdə olub və baş verənlərin bir hissəsini xatırlamır. Təqsirləndirilən şəxs əməlindən peşman olduğunu da qeyd edib.

Məhkəmənin hökmü ilə o, Cinayət Məcəlləsinin 185.2.4-cü maddəsi ilə təqsirli bilinərək 3 il 3 ay müddətinə azadlıqdan məhrum edilib. Bundan əvvəl üzərində olan cəza ilə hazırki cəza qismən toplanılıb və müttəhimə 4 il 3 ay müddətinə azadlıqdan məhrumetmə cəzası təyin olunub. Həbsdə saxlanıldığı müddət cəzadan çıxıldıqdan sonra onun üzərində qəti olaraq 4 il 2 ay 28 gün müddətinə azadlıqdan məhrumetmə cəzası saxlanılıb.